ԵՐԵՎԱՆ, 1 դեկտեմբերի- Sputnik. Հայաստանում սահմանադրական բարեփոխումների վերաբերյալ հանրաքվեին մասնակցող ԱՊՀ առաքելության կազմը լիովին ձևավորվել է։ «Հանրաքվեին ներկա կլինի 78 դիտորդ»,- նշված է ԱՊՀ գործադիր կոմիտեի կայքում։
ԱՊՀ դիտորդական առաքելությունը շարունակում է ՀՀ սահմանադրական փոփոխությունների հանրաքվեի նախապատրաստման և անցկացման մշտադիտարկում իրականացնել։
Առաքելության կազմում ընդգրկվել են Բելառուսի, Ղազախստանի, Ղրղըզստանի, Մոլդովայի, Ռուսաստանի, Տաջիկստանի, Թուրքմենստանի, Ուզբեկստանի, ԱՊՀ անդամ երկրների միջխորհրդարանական վեհաժողովի, Բելառուսի և Ռուսաստանի միության խորհրդարանական ժողովի, ԱՊՀ գործադիր կոմիտեի ներկայացուցիչները։
ԱՊՀ դիտորդները հանդիպումներ են անցկացրել Հայաստանի կառավարությունում և Հեռուստատեսության ու ռադիոյի ազգային հանձնաժողովում, քննարկել են գալիք համազգային քվեարկության նախապատրաստմանը վերաբերող հարցեր։
Առաքելության ներկայացուցիչները ծանոթացել են Երևան քաղաքի, Արարատի և Վայոց Ձորի մարզերի հանձնաժողովների աշխատանքին։ Դիտորդները նշում են, որ հանրաքվեի հանձնաժողովների կազմերը ձևավորված են, ավարտվում է նրանց ուսուցման գործընթացը։ Սկսվել է հանրաքվեում քվեարկության համար քվեաթերթիկների պատրաստումը։ Շարունակում են ծանոթանալ մասնակցության իրավունք ունեցող քաղաքացիների ցուցակներին։
Դեկտեմբերի 6-ին նախատեսված հանրաքվեին մասնակցելու իրավունք ունեցող քաղաքացիների ընդհանուր թիվը 2 551 682 է կազմում։
