ԵՐԵՎԱՆ, 1 դեկտեմբերի - Sputnik, Գոհար Սարգսյան. Վերջին շրջանում Կոտայքի մարզի Աբովյանի տարածաշրջանի Ակունք գյուղի Ս. Պողոս-Պետրոս մատուռ-սրբավայր այցելողներն անակնկալի են գալիս: Խոնարհված Ս. Պողոս մատուռ, այս ու այն կողմ թափված քարեր, բացօթյա խորան ու մի փոքր հեռվում լուռ իր հերթին սպասող Ս. Պետրոս. աչք ծակող տեսարան է: Եկեղեցու մասին տարբեր հրաշապատումներ լսած ու դրանց հետքերով եկած մարդու մոտ հակասական զգացողություններ են առաջանում: Իրականում ի՞նչ է կատարվում:
Հայաստանում Սանտա Կլաուսի դռները փակ են. արտասովոր եկեղեցու տխուր ճակատագիրը
Կոտայքի թեմի Աբովյանի տարածաշրջանի Ակունք գյուղի Ս.Պողոս-Պետրոս մատուռ-սրբավայրում 3 տարի առաջ մասնագետները պեղումներ են իրականացրել, հետո Սուրբ Պողոս ու Սուրբ Պետրոս մատուռներն ապամոնտաժել են: Պեղումների միջոցով գտնված հիմնաքարերն արդեն կտրել, մշակել են ու սպասում են գարնանը, որ կիր ու քարով վերականգնեն եկեղեցու նախնական տեսքը:
«70-ական թվականներին տեղի գյուղացիները մատուռների վրա ցեմենտ-ավազե ու մետաղապատ հավելումներ են արել, որոնք աղճատել են հուշարձանի պատմական գեղագիտական ու ճարտարապետական նշանակությունն ու տեսքը: Հուշարձանը բերվել է նախկին վիճակի, որպեսզի վերականգնողական աշխատանքներ կատարվեն: Սկզբում պեղումներ են կատարել, հետո մասնագետներն անցել են բուն աշխատանքներին»,- տեղեկացնում է Մշակույթի նախարարության պատմության և մշակույթի հուշարձանների պահպանության գործակալության պետ Արմեն Աբրոյանը:
Ամեն տարի դեպի Պողոս-Պետրոս եկեղեցի են ուղղվում բազմաթիվ հայաստանցիներ ու զբոսաշրջիկներ: Հարության տոնի երկրորդ կիրակին, որն առավել հայտնի է որպես Կանաչ կիրակի, Պողոս-Պետրոսի ուխտի օր է հռչակված: Այս տարի ուխտագնացության օրը ապամոնտաժված եկեղեցում անցկացված պատարագը յուրահատուկ է եղել, որովհետև բացօթյա պատարագն ընթացել է Սուրբ սեղանի` խորանի վրա:
«Ուխտավորներն իրենց աղոթքը հղեցին առ Աստված: Բոլորը հիացմունքով արտահայտվեցին նախաձեռնության մասին, քանի որ տևական դադարից հետո եկեղեցին կենդանանում է: Մեր նպատակն էր փրկել եկեղեցին, որը խոնարհվել էր: Հայաստանի տարածքում դեռ շատ եկեղեցիներ կան, որոնք անմխիթար վիճակում են և հոգածության կարիք ունեն»,-ասում է Տեր Զոհրապ քահանա Մանասյանը:
Իսկ սրբավայրի շրջակայքում ապրող գյուղացիները իրադարձությունների անմիջական ականատեսն են: Նրանք պնդում են, որ ամեն ինչ տեսնում ու լսում են:
«Հովանավորը Ռուսաստանում ապրող հայ բիզնեսմեն է: Ասեց`1.5 տարուց պիտի պատրաստ տաք մեզ: Ոնց որ անունն էլ Արամ է»,-պատմում է Վազգեն պապը:
Իսկ մասնագետներն աշխատանքներն ավարտելու հստակ ժամկետ չեն նշում:
Պողոս-Պետրոս եկեղեցում հրաշքներ են կատարվել, ու դա փաստում է տեղի հոգևոր սպասավորը: Նրա խոսքով` մարդիկ անդամալույծ ու խոսելու ունակությունից զրկված երեխաներ են բերել, որոնք աղոթքի ուժով բժշկվել են: Դրա համար էլ, ըստ մեր զրուցակցի, Պողոս-Պետրոսից անդադար աղոթքներ են բարձրանում:
Քարե «ինստագրամ», կիսալուսին խաչի վրա և Օձունի եկեղեցու այլ գաղտնիքները
Պողոս-Պետրոս եկեղեցու հիմնաքարերը դրվել են 5-7-րդ դարերում: 11-րդ դարում ուժեղ երկրաշարժի հետևանքով եկեղեցին ավերվել է: Բարերարները կարողացել են եկեղեցին վերականգնել միայն 12-13-րդ դարերում, իսկ պատմությունը լռում է եկեղեցին կառուցողների մասին:
Անեթը միշտ մտքիս էր. ինչու Տեր Նշանը կուսակրոն չդարձավ, կամ մեկ օր քահանայի ընտանիքի հետ
