ԵՐԵՎԱՆ, 1 դեկտեմբերի — Sputnik. ԱՄՆ-ի նախագահ Բարաք Օբաման Թուրքիայի նախագահ Թայիփ Էրդողանի հետ քննարկել է, թե Թուրքիան ու ՌԴ-ն ինչպես պետք է համատեղ աշխատեն ռուսական Սու-24 ռմբարկուի միջադեպից հետո, հայտնում է ՌԻԱ Նովոստին` հղում անելով Ռոյթերս գործակալությանը։
Ռուսաստանի և Թուրքիայի հարաբերությունները կտրուկ սրվեցին, երբ նոյեմբերի 24-ին Սիրիայում վթարի ենթարկվեց ռուսական Սու-24 ռմբարկուն։ Ռուսաստանի նախագահ Վլադիմիր Պուտինը հայտարարեց, որ ինքնաթիռը խոցվել է սիրիական տարածքում թուրքական F-16-ի կողմից, այնուհետև օդանավն ընկել է Թուրքիայի սահմանից 4 կմ հեռավորության վրա: Ռուսաստանի նախագահն այս դեպքը «թիկունքից հասցված հարված» որակեց։
Թուրքիան պնդում է, որ Սու-24-ը խախտել է իր օդային տարածքը։ ՌԴ գլխավոր շտաբը հայտարարել է, որ ինքնաթիռը չի հատել սահմանը, ինչի մասին վկայում են Սիրիայի ՀՕՊ-ի տվյալները։ Ռոյթերսի աղբյուրների տվյալով` Վաշինգտոնը հիմք ունի համարելու, որ օդանավը խոցվել է Սիրիայի տարածքում, սակայն այդ տեղեկությունը Պենտագոնում պաշտոնապես չեն հաստատել։
Սու-24-ի օդաչու Օլեգ Պեշկովին սպանել են այն պահին, երբ նա օդանավից դուրս է նետվել։ Նրա ուղղությամբ կրակել են ցամաքային տարածքից, որը վերահսկում են սիրիական թուրքմենները։ Փրկված շտուրմանը` Կոնստանտին Մուրախտինը, հայտնել է, որ ավտոմեքենան սահմանը չի հատել, թուրքական ՌՕՈՒ-ն որևէ նախազգուշացում չի արել օդանավի անձնակազմին։
