ԵՐԵՎԱՆ, 30 նոյեմբերի – Sputnik. Թուրքիան Հարավային Կովկասում պատրաստ է ցանկացած սադրանքի գնալ, որպեսզի շեղի Ռուսաստանին Սիրիայից, Sputnik Արմենիա պորտալին ասաց ԽՍՀՄ ցամաքային զորքերի շտաբի պետի նախկին տեղակալ, անկախ Հայաստանի բանակի ստեղծողներից մեկը` գեներալ–լեյտենանտ Նորատ Տեր–Գրիգորյանցը։
«Թուրքիայի գործողությունների արդյունքում ռազմա–քաղաքական իրավիճակը կտրուկ փոխվել է։ Թուրքիան խոցել է Սու-24 ինքնաթիռը, փորձում է իրեն պահել այնպես, կարծես Սիրիան իր տարածքում է, ինչպես Օսմանյան կայսրության ժամանակ», – նշում է Տեր–Գրիգորյանը։
Նոյեմբերի 24-ին Թուրքական ՌՕՈՒ–ն խոցել է ռուսական Սու-24 ինքնաթիռը, որը ներգրավված էր Սիրիայում ահաբեկիչների դեմ պայքարի գործողություններում։ Օդաչուներից մեկը զոհվել է, երբ նրան ինքնաթիռից նետվելու պահին գնդակահարել են ցամաքից, երկրորդին հաջողվել է փրկվել։ Անկարան պնդում է, որ Սու-24-ը խախտել է իր օդային տարածքը։ ՌԴ ՊՆ–ն կտրականապես հերքում է այդ փաստը։ Ռուսաստանի նախագահ Վլադիմիր Պուտինն այս դեպքը «թիկունքից հասցված հարված» էր որակել։
Մյուս կողմից, Տեր–Գրիգորյանցի խոսքերով, Թուրքիան փորձում է չթույլատրել Սիրիայում քրդական ինքնավարության ստեղծում` զգուշանալով, որ նրանք ապագայում կարող են միանալ թուրքական քրդերին։
«Թուրքիան իր դաշնակից Ադրբեջանի հետ շարունակում է ծածուկ վնասել Ռուսաստանին։ Եթե Թուրքիան խոցել է ռուսական ինքնաթիռը, ապա նրանից ամեն ինչ սպասելի է։ Ռուսաստանի և հասարակության ուշադրությունը Սիրիայից շեղելու համար Թուրքիան և Ադրբեջանը կարող են ամեն ինչ կազմակերպել Հարավային Կովկասում», – նշեց Տեր–Գրիգորյանցը։
Գյումրու ռուսական ռազմակայանում սկսված ռազմական վարժանքների մասին հարցին Տեր–Գրիգորյանցն ասաց, որ դրանք կարող են կամ պլանային լինել, կամ զորքերը բերվում են լիարժեք մարտական պատրաստվածության` կապված վերջին իրադարձությունների հետ։
«Անհրաժեշտ է ստուգել զորքի պատրաստվածության աստիճանը։ Հարկ է Թուրքիային ցույց տալ մեր մարտական պատրաստվածությունը, որպեսզի նրա մոտ հայ–թուրքական սահմանին սադրանքներ իրականացնելու մտքեր չառաջանան», – ասաց Տեր–Գրիգորյանցը։
Հայաստանի ռուսական ռազմակայանում անվտանգության պահանջներին վերաբերող համալիր վարժանքներ են անցկացվում։ Վարժանքներում ներգրավված է ավելի քան 100 միավոր ռազմական տեխնիկա։ Վարժանքներին մասնակցել է ՌԴ կայանի ավելի քան 2 հազար զինծառայող և քաղաքացիական անձնակազմի աշխատակից։
