ԵՐԵՎԱՆ, 30 նոյեմբերի – Sputnik. Թուրքիայից կարգելվի պտուղ-բանջարեղենի ներմուծումը, սակայն արգելքը կսկսի գործել միայն մի քանի շաբաթ հետո, երկուշաբթի Դմիտրի Մեդվեդևի հետ խորհրդակցության ժամանակ հայտնել է ՌԴ փոխվարչապետ Արկադի Դվորկովիչը։
Ավելի վաղ շաբաթ օրը Ռուսաստանի նախագահը հրաման էր ստորագրել Թուրքիայի նկատմամբ տնտեսական հատուկ միջոցներ մտցնելու վերաբերյալ։ Այս որոշումը կայացվել է` ի պատասխան ռուսական Սու-24 ռմբարկուի խոցմանը։ Պուտինն արգելել է տարբեր տիպի թուրքական ապրանքների ներմուծումը, որոնց ցանկը հանձնարարվել էր պատրաստել կառավարությանը։
Ինչպես Sputnik–ին հայտնել է «Ռոսսելխոզնադզորի» ներկայացուցիչ Ալեքսեյ Ալեքսեենկոն, ռուսաստանցիները բանջարեղենի և մրգի պակաս չեն զգա։ Ալեքսեենկոյի խոսքով` Ռուսաստանն այդ ապրանքի կարիքն այնքան շատ չի զգում, քանի որ երկիրը դրանց արտադրությունն ավելացրել է Հյուսիսային Կովկասում, Ստավրոպոլում, Ռոստովում և Վոլգոգրադի շրջանում։
«Այս նորությունը ուրախացրեց մեր հարևաններին` Անդրկովկասի երկրներին, Հայաստանին, բավականին դրական այս նորությունն ընդունեցին Վրաստանը և Ադրբեջանը, Իրանն էլ պատրաստ է զգալիորեն ավելացնել բուսական արտադրանքի ներմուծումը, ընդ որում, մթերքն իրոք բարձրորակ է», – հայտնել է Ալեքսեենկոն։
Բացի այդ, Հայաստանը, փորձագետի խոսքով, պատրաստ է արդեն այսօր այդ բացը լրացնել և ավելացնել մրգի ու բանջարեղենի արտադրությունը ռուսական շուկայի համար։
Ռուսաստանի և Թուրքիայի հարաբերությունները ճգնաժամ են ապրում այն բանից հետո, երբ երեքշաբթի Սիրիայում վթարի ենթարկվեց ռուսական Սու-24 ռմբարկուն։ Ռուսաստանի նախագահ Վլադիմիր Պուտինը հայտարարեց, որ ինքնաթիռը խոցվել է սիրիական տարածքում թուրքական F-16-ի կողմից և ընկել Թուրքիայի սահմանից 4 կմ հեռավորության վրա: Ռուսաստանի նախագահն այս դեպքը «թիկունքից հասցված հարված» որակեց։ Անկարան պնդում է, որ Սու-24-ը խախտել է իր օդային տարածքը։ Թուրքիայի ագրեսիային ի պատասխան` ՌԴ կառավարությունը մի շարք տնտեսական սահմանափակումներ է մտցնում։
