ԵՐԵՎԱՆ, 30 նոյեմբերի- Sputnik. Ղրիմի դաշնային շրջանում շուրջ մեկ միլիոն սպառող դեռ զրկված է էլեկտրամատակարարումից, հայտնում է ՌԴ էներգետիկայի նախարարությունը։ «Երևանի ժամանակով 8։00-ի դրությամբ առանց էլեկտրամատակարարման է մնում շուրջ 1,049 միլիոն մարդ։ Հզորությունը (անջատումներ. խմբ) կազմում է 440 ՄՎտ»,- նշվում է հաղորդագրությունում։
Մասնավորապես, Ղրիմում առանց էլեկտրականության է մնում շուրջ 777,4 հազար մարդ (325 ՄՎտ), Սևաստոպոլում` 272,5 հազար մարդ (115 ՄՎտ)։
Ուկրաինայի Խերսոնյան մարզում վնասվել են էլեկտրահաղորդման գծերը, որոնք էլեկտրաէներգիա են մատակարարում Ղրիմ։ Նոյեմբերի 22-ից Ուկրաինան լիովին դադարեցրել է էլեկտրաէներգիայի մատակարարումը։ Ղրիմում և Սևաստոպոլում արտակարգ իրավիճակի ռեժիմ է սահմանվել։
Ներկա պահին Ղրիմում և Սևաստոպոլում սոցիալական նշանակություն ունեցող բոլոր օբյեկտները միացված են սնուցման պահեստային աղբյուրներին։ Սոցիալական կարևորություն ունեցող և ենթակառուցվածքային օբյեկտների էլեկտրամատակարարումը վերականգնելու համար գործարկվել են 1138 աղբյուր` 178,7 Մվտ հզորությամբ։ Սպառողներին էլեկտրաէներգիայով ապահովելու աշխատանքները շարունակվում են։
