ԵՐԵՎԱՆ, 30 նոյեմբերի- Sputnik. Ֆրանսիական օդանավակայաններում ինքնաթիռների զննման ժամանակ ուղևորատար օդանավերի վրա արաբերեն գրություններ են հայտնաբերվել։ Այս մասին գրում է ՌԻԱ Նովոստին` հղում անելով La Tribune-ին, որն էլ իր հերթին վկայակոչում է իրավապահ մարմիններում և օդանավակայանների ծառայություններում ունեցած աղբյուրներին:
Հաղորդագրության համաձայն, ձեռագիր գրություններ են եղել բրիտանական EasyJet ավիաընկերության չորս ինքնաթիռի վրա, ևս մեկ գրություն էլ հայտնաբերել են իսպանական Vueling ինքնաթիռի վրա: Ընդհանուր առմամբ Լիոն քաղաքի օդանավակայանում բացահայտվել է երեք դեպք, երկու դեպք` Փարիզի Ռուասի-Շառլ դե Գոլ օդանավակայանում, գրում է ՌԻԱ Նովոստին:
Իրավապահ մարմինների ներկայացուցիչները ենթադրում են, որ գրություններն արվել են թռիչքից առաջ, այսինքն` մինչ ֆրանսիական տարածք վայրէջք կատարելը: «Այդ գրությունները ստիպում են մտորել օդանավակայանների անվտանգության շուրջ»,- գրում է թերթը։
Հաղորդագրությունում նշվում է, որ նման դեպք էր բացահայտվել նոյեմբերի 24-ին Փարիզի օդանավակայանում. արաբերեն գրություններ էին գտել Բուդապեշտից ժամանած ինքնաթիռի վրա։
Բրիտանական EasyJet-ի ներկայացուցիչները խոստովանել են, որ, իրոք, նման միջադեպեր են գրանցվել Ֆրանսիայում։ Միաժամանակ նշել են, որ այդ գրություններն «անվտանգությանը չեն սպառնում»։
Փարիզի Ռուասի և Լը Բուրժե օդանավակայների ներկայացուցիչները հայտարարել են, որ պատրաստվում են ստուգել փակ գոտիներում մուտք գործելու իրավունք ունեցող 86 հազար աշխատակցի աշխատանքի թույլտվության փաստաթղթերը։
