ԵՐԵՎԱՆ, 29 նոյեմբերի — Sputnik. Երևանի Ստանիսլավսկու անվան ռուսական դրամատիկական թատրոնը վերադարձել է Մոսկվայի հյուրախաղերից: Թատրոնի համար արդեն սովորական են դարձել հաջողությունները, թատրոնը բազմիցս միջազգային թատերական փառատոների հեղինակավոր մրցանակների է արժանացել: Եվ այստեղ մեծ դեր ունի թատրոնի գեղարվեստական ղեկավար, Հայաստանի ժողովրդական արտիստ և Ռուսաստանի արվեստի վաստակավոր գործիչ Ալեքսանդր Գրիգորյանը, ով արդեն 50 տարի գլխավորում է ռուսական մշակույթի այդ օջախը:
ՌԴ մշակույթի նախարարության և Հյուրախաղային գործունեության աջակցման դաշնային կենտրոնի օգնությամբ կազմակերպած «Մեծ հյուրախաղերի» շրջանակում Երևանի ռուսական թատրոնը Մոսկվայում երեք բեմադրություն է ներկայացրել:
«Մենք ընտրեցինք ռուսական դասական ստեղծագործությունները` Գոգոլի «Ռևիզորն» ու Օստրովսկու «Ամեն ինչ` վաճառքի» («Աշխույժ տեղում»), ինչպես նաև հայտնի ռուս գրող Յուրի Պոլյակովի պիեսի հիման վրա ստեղծված «Աֆրոդիտեի ձախ կուրծք» ներկայացումները: Առաջին երկու բեմադրությունները բարձր մրցանակի արժանացան Սանկտ Պետերբուրգի թատերական միջազգային փառատոնին: Երևանի ռուսական թատրոնը խաղացանկային է և միշտ նպատակ ունի Հայաստանի հանդիսատեսին ծանոթացնել դասական գրականության և ժամանակակից դրամատուրգիային` Ռոզովի, Վամպիլովի, Գալինի, Գելմանի պիեսներին», — ասաց Գրիգորյանը:
Հյուրախաղերը տեղի են ունեցել երկու բեմահարթակում` Կինոդերասանի և «Մոդեռն» թատրոններում: Մոսկվայի հյուրախաղերը բավականին լուրջ փորձություն են անգամ հանրաճանաչ կոլեկտիվների համար: Սակայն ջերմ ընդունելությունն ու բարձր գնահատականը չափազանց խոսուն են:
Երևանի թատրոնը հռչակվել է արտերկրի ռուսական լավագույն թատրոններից մեկը: Բազմաթիվ արձագանքներ է ստացել «Կրքեր Ռևիզորի շուրջ» ներկայացումը: Մոսկվայի գեղարվեստական թատրոնի գեղարվեստական ղեկավար Օլեգ Տաբակովը, իմանալով խաղացանկի մասին, ասել էր. «Եթե երեք ներկայացումներից երկուսը ռուսական դասական գրականությունից են`հրաշալի «Ռևիզորն» ու «Ամեն ինչ` վաճառքի», ապա հաջողությունը երաշխավորված է»:
Մոսկվայի «Մոդեռն» թատրոնի գեղարվեստական ղեկավար Սվետլանա Վրագովան հիացական խոսքեր է ասել «Աֆրոդիտեի ձախ կուրծքը» բեմադրության մասին. «Փայլուն ներկայացում է», — նշել է նա:
Դաշնային կենտրոնը առաջարկել է թատրոնին հյուրախաղեր ունենալ Արևելյան Սիբիրի քաղաքաներում:
Կարևոր է նաև հանդիսատեսի կարծիքը, որը բարձր է գնահատել Երևանի դերասանների բեմական խոսքը:
«Ելույթ ունենալն այնպիսի թատերական Մեքքայում, ինչպես Մոսկվան է, հոգու և սրտի մեծ տոն է, ռուս հանդիսատեսի հետ հանդիպման մեծ ուրախություն: Մեր հանդիպումները հայ և ռուս ժողովուրդներին մերձեցնելու գործում իրենց դերն ունեն», — նշեց Երևանի ռուսական թատրոնի գեղարվեստական ղեկավար Գրիգորյանը:
Ամեն տարի թատրոնը երկու մանկական ներկայացում է բեմադրում` փորձելով հայ երեխաների մոտ ռուսական թատրոնի, լեզվի և ընդհանրապես մշակույթի նկատմամբ սեր սերմանել: Երևանյան բեմում հաջողությամբ ներկայացվում են Յուրի Պոլյակովի երեք պիեսների բեմադրությունները` «Համադասարանցիներ», «Ինչպես աստվածներ…» և «Աֆրոդիտեի ձախ կուրծքը»։
Ալեքսանդր Գրիգորյանի ռեժիսորական աշխատանքը միշտ ինքնատիպ է, ինչը երևում է և՛ դասական գործեր բեմադրելիս, և՛ հայտնի պիեսներին սեփական մոտեցում ցուցաբերելիս, և՛ արդիականությունը ինքնատիպ ներկայացնելիս:
