ԵՐԵՎԱՆ, 28 նոյեմբերի — Sputnik. Հարավային Օսիայի խորհրդարանը կքննարկի Հայոց ցեղասպանության ճանաչման հարցը, ասել է խոսնակ Անատոլի Բիբիլովը, հայտնում է Sputnik Հարավային Օսիան։
«Մենք ցավում ենք, որ Հարավային Օսիան մինչ օրս չի ճանաչել հայերի ցեղասպանությունը: Այժմ Հայոց ցեղասպանության ընդունման հարցը մտցված է հանրապետության խորհրդարանի օրակարգ և դրվելու է քննարկման: Անհրաժեշտ է Օսմանյան կայսրության կողմից իրականացված գործողությունները որակել որպես հանցագործություն և դատապարտել ցեղասպանության մերժման քաղաքականությունը», — ասել է Բիբիլովը:
Խոսնակը նշել է, որ «եթե համաշխարհային գերտերություններն այս հարցում առաջնորդվում են կոնյունկտուրային շահերով, Հարավային Օսիայում պատմական ճշմարտությունը կասկածի տակ չի դրվում, այդ իսկ պատճառով առաջնորդվելով պատմական արդարության և հիշողության պահպանման սկզբունքներով` կարևոր է ճանաչել Օսմանյան կայսրությունում տեղի ունեցած վայրագությունների և հայերի զանգվածային սպանությունների փաստը»:
Բիբիլովն ասել է, որ Հարավային Օսիայի կողմից Հայոց ցեղասպանության ճանաչման հարցն այսօր չի առաջացել, սակայն հենց հիմա է նոր իմաստ ու նշանակություն ստացել:
«Հաշվի առնելով ռուսական ինքնաթիռը խոցելու վերջին միջադեպը և այն գնահատելով որպես ագրեսիայի դրսևորում մեր գլխավոր ռազմավարական դաշնակից Ռուսաստանի նկատմամբ` կարծում եմ, որ անպատկառ Թուրքիային միակ համարժեք պատասխանը, մի շարք այլ համալիր պատասխան քայլերի հետ մեկտեղ, կլինի Հայոց ցեղասպանության ճանաչման հարցը», — ընդգծել է խորհրդարանի նախագահը:
Նա նաև նշել է, որ Հարավային Օսիային չի անհանգստացնում Թուրքիայի հետ հարաբերությունների վատացումը, քանի որ հարաբերություններ գրեթե չկան: Նույնը, խոսնակի կարծիքով, վերաբերում է Ադրբեջանին, որը ՀՕՀ գործընկերը չէ:
«Թուրքիան նպաստում է այն քարոզչության տարածմանը, որը նպաստում է Վրաստանի և Հյուսիսային Կովկասում ՌԴ քաղաքացիների արմատականացմանը, իսկ հետո Թուրքիան նպաստում է այդ մարդկանց տեղափոխմանը իր տարածք, իսկ հետո Թուրքիայից դեպի Սիրիա: Թուրքիան նաև աջակցում է Վրաստանի` ԵՄ-ի և ՆԱՏՕ-ի կազմում ընդգրկվելու ծրագրերին: Վրաստանը Թուրքաիայի համար միշտ շատ կարևոր երկիր է եղել: Թուրքիան երբեք չի դատապարտել Հարավային Օսիայի նկատմամբ Վրաստանի ագրեսիան, այլ համառորեն աջակցել է «Վրաստանի տարածքային ամբողջականությանն ու ինքնիշխանությանը»` հրաժարվելով ճանաչել տարածաշրջանում ստեղծված քաղաքական նոր իրողությունները», — հիշեցրել է Բիբիլովը:
