ԵՐԵՎԱՆ, 28 նոյեմբերի — Sputnik. Թուրքիայի ԱԳՆ-ն խորհուրդ է տալիս իր քաղաքացիներին` հրաժարվել ՌԴ մեկնելուց մինչև ռուս-թուրքական հարաբերությունների ճգնաժամային իրավիճակի կարգավորումը:
«Ռուսաստանի և Թուրքիայի միջև առաջացած իրավիճակի հետ կապված` նոյեմբերի 24-ից սկսած Ռուսաստան մեկնող կամ այնտեղ բնակվող մեր քաղաքացիների մոտ որոշակի խնդիրներ են նկատվում: Մինչև այդ իրավիճակի կարգավորումը լավ կլինի, որ մեր քաղաքացիները հետաձգեն դեպի Ռուսաստան իրենց ոչ հրատապ ուղևորությունները», — ասվում է Թուրքիայի ԱԳՆ հայտարարության մեջ:
Ռուսաստանի և Թուրքիայի հարաբերությունները ճգնաժամ են ապրում այն բանից հետո, երբ երեքշաբթի Սիրիայում վթարի ենթարկվեց ռուսական Սու-24 ռմբարկուն։ Ռուսաստանի նախագահ Վլադիմիր Պուտինը հայտարարել էր, որ ինքնաթիռը խոցվել է սիրիական տարածքում թուրքական F-16-ի կողմից և ընկել Թուրքիայի սահմանից 4 կմ հեռավորության վրա: Ռուսաստանի նախագահն այս դեպքը «թիկունքից հասցված հարված» էր որակել։ Թուրքիայի ագրեսիային ի պատասխան` ՌԴ կառավարությունը մի շարք տնտեսական սահմանափակումներ է մտցնում։
