ԵՐԵՎԱՆ, 25 նոյեմբերի — Sputnik. Ռուսաստանի Պետդուման կքննարկի 1915 թվականին իրականացված Հայոց ցեղասպանությունը ժխտելու պատասխանատվության մասին օրինագիծը, չորեքշաբթի հայտնել է «Արդար Ռուսաստան» խմբակցության առաջնորդը։
«Մենք հաստատել ենք Թուրքիայի կողմից 1915 թվականին իրականացված Հայոց ցեղասպանությունը ժխտելու պատասխանատվության մասին օրինագիծը», — գրել է նա Twitter-ի իր միկրոբլոգում։
Օրինագծի տեքստի համաձայն` կուսակցության անդամները ցանկանում են ՌԴ ՔՕ-ում ավելացնել «Արևմտյան Հայաստանում և Օսմանյան կայսրությունում 1915-1922 թվականների ընթացքում հայ ժողովրդի նկատմամբ իրականացրած ցեղասպանության փաստերի մերժումը» հոդվածը։
Եթե ժխտումը հրապարակավ է արվել, ապա այդպիսի խախտումների համար նախատեսվում են տուգանքներ մինչև 300 հազար ռուբլու չափով կամ 2 տարվա ընթացքում աշխատավարձի կամ այլ եկամտի չափով, հարկադիր աշխատանքներ (մինչև երեք տարի), ազատազրկում նույնքան ժամանակով։
