ԵՐԵՎԱՆ, 25 նոյեմբերի-Sputnik, Գոհար Սարգսյան. «Կարոտելն այն խոսքը չէ: Ամեն օր արթնանում եմ ու ինձ այստեղ օտար զգում, կարծես նոր եմ եկել Իսպանիա ու մի քանի օրից պիտի վերադառնամ Հայաստան: Սակայն դեռ ժամանակը չէ: Ուզում եմ այստեղ գումար վաստակել, որ Հայաստանում թոռնիկներիս համար մեծ ու հարմարավետ առանձնատուն կառուցեմ»,-պատմում է արդեն 6 տարի օտարության մեջ գտնվող Լեռնիկ Ազիզյանը, ում սիրտը, անվանը համապատասխան, լեռներում է
Օտար ափերում հայրենիքի շունչը մշտապես զգալու համար Լեռնիկ Ազիզյանը Հայաստանից միրգ-բանջարեղենի սերմեր է տարել Բարսելոնա: Այնտեղ մի գողտրիկ այգի է տնկել, որ անմահական ծիրան, հայկական համուհոտով լոլիկ ու վարունգ ունենա, մանդակ, սպանախ ու զանազան կանաչեղեն աճեցնի, որոնց անունները իսպանացիներից շատերն առաջին անգամ են լսում: Ի դեպ, ռեհանը Իսպանիայում մեզ հայտնի գույնը չունի:
Նա պատմում է, որ իսպանական լոլիկից ու վարունգից ձկան համ է գալիս: Լինելով քարից հաց ստեղծող իսկական հայ` մշակել է համեղ պտուղներ ստանալու սեփական բաղադրատոմսը. մի քիչ իսպանական արև ու խոնավություն` համեմված հայկական ընտիր սերմերով: Այս համադրությունը հիացրել է իսպանացիներին, և նրանք սկսել են Լեռնիկին անվանել «հրաշագործ մշակ»:
«Հարևաններս հերթ են կանգնում: Ամեն օր գալիս են ու այգուցս որևէ բան խնդրում։ Ես էլ նրանց խնդրածից 3 անգամ ավելին եմ տալիս: Այդ պահին պետք է տեսնել նրանց ապշահար դեմքերը. հայկական առատաձեռնությունը եվրոպացիների համար մեղմ ասած խորթ է: Հենց մի քիչ դրականով լիցքավորվելու կարիք եմ ունենում, գնում եմ իմ «հայկական» այգի»,- պատմում է Լեռնիկ Ազիզյանը:
Քանի դեռ Հայաստան չի վերադարձել, որոշել է Իսպանիայում մի կարևոր առաքելություն իրականացնել` սեփական օրինակով ցույց տալ այստեղ բնակվող հայերին, թե ինչպես է հնարավոր չձուլվել ու պահպանել հայի շունչը:
«Իսպանիայում է ապրում նաև դուստրս ընտանիքի հետ: Երբ թոռնիկս վերադառնում է քոլեջից, ակամա սկսում է իսպաներեն խոսել, ես խիստ հայացք եմ նետում, ու նա անմիջապես անցնում է հայերենի»,-ժպտալով պատմում է Լեռնիկը:
Հետո ավելի մտախոհ ձայնով ավելացնում է, որ Իսպանիայում հայերին ձուլման վտանգ է սպառնում: Նրանց թիվը փոքր չէ: Այնտեղ ներկայում բնակվում է մոտ 40 հազար հայ, որոնք մեծ մասամբ արտագաղթել են վերջին 10-15 տարիների ընթացքում: Լեռնիկը նկատել է, որ այնտեղ ապրող հայ երիտասարդները սկսել են հեռանալ հայկական ավանդույթներից: Իսպանիայում հայկական եկեղեցի չկա, իսկ մենք գիտենք, որ կրոնը համախմբող գործառույթ ունի:
«Իսպանիայի հայաշատ վայրերում, հատկապես Մադրիդում, որտեղ 12 հոգանոց եկեղեցական խորհուրդ է գործում, եկեղեցիների կառուցման անհրաժեշտություն կա: ՀՀ դեսպանությունը խոստացել է զբաղվել այդ խնդրով»,-ասում է Լեռնիկը:
Նա արմատներով Սասունից է: Չնայած պատմական հայրենիքում երբևէ չի եղել, բայց իր մեջ ամբողջացնում է իսկական սասունցու կերպարը` մի ձեռքում զենք, մյուսում` բահ: Նրա ոտքի մեջ մինչ օրս մնացած բեկորները հիշեցնում են, որ պայքարել է հայոց 2-րդ պետության նվիրական գոյամարտում, ու խոստովանում է, որ ցանկացած պահի պատրաստ է նորից մեկնել մարտադաշտ հանուն հայրենիքի: Լեռնիկ Ազիզյանը վերջերս Հայաստան է ճանապարհել օտարության մեջ ապրել չցանկացող կնոջը` խոստումով, որ շատ շուտով հայրենի հողում կմիանա նրան:
