ԵՐԵՎԱՆ, 25 նոյեմբերի-Sputnik. Կիպրոսի ուղղափառ իրավապաշտպան կենտրոնի ղեկավար Մարիուս Ֆոտիուն երկրի նախագահ Նիկոլ Անաստասիադիսին խնդրանք է հղել կղզում ռուսական ռազմակայան տեղակայելու հարցով, որը պետք է պաշտպանի երկիրը «Իսլամական պետություն» ահաբեկչական խմբավորման հարձակումներից:
Կիպրոսի քաղաքացիները ստորագրահավաքով աջակցում են Ֆոտիուի հորդորին:
Փաստաթղթում հատկապես ընդգծվում է, որ նախաձեռնող խումբը ՆԱՏՕ-ի անդամ երկրների կողմից ահաբեկչության դեմ պայքարում գործադրվող ջանքեր չի տեսնում:
«Ահաբեկիչները նորանոր երկրների են սպառնում: Ցավալիորեն ռիսկային գոտում է հայտնվել նաև Կիպրոսը: Մենք հուսադրվեցինք, երբ իմացանք, որ Ռուսաստանը որոշում է ընդունել Սիրիայում գործադրել սեփական մարտավարությունը: Քանի դեռ ահաբեկիչներին չեն հաղթել, մեր երկիրն ամենառիսկային գոտում է: Մեր բանակին, ավիացիային ու նավատորմին ուժեղ և խելամիտ գործընկերոջ աջակցությունն է պետք: Անկասկած, Ռուսաստանը Եվրոպային ցուցադրել է խաղաղության ու արդարության պահպանման սկզբունքները»,-ասված է հաղորդագրության մեջ:
Sputnik լրատվական պորտալի թղթակիցը թեմայի վերաբերյալ զրուցեց Կիպրոսում ապրող հայազգի Հրաչ Սահակյանի հետ: Նա պատմեց, որ Կիպրոսի քաղաքացիները լավ են հիշում ամիսներ առաջ կայացած Ռուսաստանի և Կիպրոսի նախագահների հետ հանդիպման ու փոխգործակցության համաձայնագրի մասին:
«Ռուսաստանն ու Կիպրոսը որոշեցին ռազմական համագործակցության հիմքեր դնել: Այսինքն` ռուսական նավերը պարբերաբար կարող էին մտնել կղզի պետության ցանկացած նավահանգիստ: Խոսքը վերաբերում էր այն նավերին, որոնք մասնակցում են ահաբեկչության դեմ պայքարի միջազգային առաքելությանը: Հիմա Կիպրոսի քաղաքացիները պահանջում են գործի դնել ձեռք բերված համաձայնությունը»,-իրադարձությունների վայրից
ներկայացրեց Սահակյանը:
