ԵՐԵՎԱՆ, 24 նոյեմբերի- Sputnik. Համաշխարհային արժույթների ֆոնին հայկական դրամի ամրապնդումը ժամանակավոր է, Sputnik Արմենիա պորտալին ասաց տնտեսական գիտությունների դոկտոր Վարդան Բոստանջյանը։
Հայաստանի Կենտրոնական բանկի տվյալով` երկրում երկու օրվա ընթացքում դոլարի փոխարժեքը նվազել է 0,62 դրամով և տվյալ պահին կազմում է 481,06 դրամ։ Եվրոյի փոխարժեքը նվազել է 2,7 դրամով` կազմելով 512,14 դրամ, իսկ ռուբլու փոխարժեքը` 0,12 դրամով` կազմելով 7,31 դրամ։
«Ամենայն հավանականությամբ, դրամի ամրապնդումը սեզոնային բնույթ է կրում։ Տվյալ դեպքում բոլոր տնտեսվարող սուբյեկտների մոտ բարձր ակտիվություն է նկատվում, ինչն էլ դրամի ժամանակավոր ամրապնդման է հանգեցրել։ Բացի այդ, նման միտումը կապված է համաշխարհային աշխարհաքաղաքական գործընթացների հետ։ Հիմա շատ թե քիչ հանգիստ է, ինչը կազդի նաև ֆինանսական շուկայի վրա»,- ասաց Բոստանջյանը։ Մյուս կողմից, Հայաստանի Կենտրոնական բանկը դրամի ամրապնդման քաղաքականություն է վարում և դրա համար օգտագործում է իր գործիքները։
«Բյուջեի կատարման տեսանկյունից նման իրավիճակը շահավետ է։ Ես կարծում եմ, որ առաջիկա օրերին արժույթային շուկայի ներկա իրավիճակը կպահպանվի։ Բայց Նոր տարվա նախաշեմին կնկատվի հակառակ միտում»,- նշեց տնտեսագետը։
Նրա խոսքով, եթե հիմա տնտեսության տարբեր ոլորտներում ուժեղացված գործողություններ են ձեռնարկվում, ապա Նոր տարվա շեմին տնտեսությունում իրավիճակը կկայունանա, ինչը դրամի փոխարժեքի անկման կհանգեցնի։ Այսպիսով, նույնիսկ ազգային արժույթի շրջանառության ավելացումն ու դրամի ժամանակավոր թանկացումը Նոր տարվա նախաշեմին չեն կարող կանխել հետագա անկումը։
Բոստանջյանը ենթադրում է, որ դրամի փոխարժեքի անկումը կապված կլինի նաև ապրանքների գների բարձրացման հետ։ Իսկ այն, որ ներկրվող ապրանքների գները (հատկապես՝ արդյունաբերական ապրանքներինը) տոնական օրերին կաճեն, տնտեսագետի կարծիքով, կասկած չի հարուցում։
Բացառություն կկազմեն միայն գյուղատնտեսական ապրանքները։ «Տարին բավական բերքառատ էր գյուղատնտեսության համար, ինչի արդյունքում մթերքի գները բավականին ցածր էին, այս հարցում կարևոր դեր ունի նաև զարգացած ջերմոցային տնտեսությունը»,- նշեց փորձագետը։
