ԵՐԵՎԱՆ, 21 նոյեմբերի — Sputnik. Հայաստանի 2016 թվականի բյուջում կենսաթոշակների և աշխատավարձերի բարձրացում նախատեսված չէ: Կառավարությունն ընդունում է, որ այս հարցը սոցիալական կարևորություն ունի, բայց հայտարարում է, որ բարձրացումների համար անհրաժեշտ գումար բյուջեում չկա:
Փաստորեն 2016 թվականին նվազագույն աշխատավարձը պահպանվում է 55 հազարի մակարդակում, որը հաստատվել էր 2015 թվականի հուլիսի 1-ին, իսկ հիմնական կենսաթոշակը՝ 16 հազարի մակարդակում: Անփոփոխ կմնա նաև ստաժի դիմաց տրվող գոււմարը՝ աշխատանքային ստաժի մեկ տարվա արժեքը առաջին տասը տարվա համար՝ 800 դրամ, տասը տարին գերազանցող յուրաքանչյուր տարվա համար՝ 500 դրամ: Sputnik Արմենիան այս կապակցությամբ հարցում է անցկացրել քաղաքացիների շրջանում և պարզել, թե ինչպես են նրանք վերաբերվում այս փաստին:
«Ես ու ամուսինս ապրում ենք մեր կենսաթոշակով, որը մեզ չի բավականացնում: Որևէ այլ եկամուտ չունենք: Ապրում ենք առանց հույսի, առանց ապագայի հանդեպ հավատի»,- ասում է տիկին Ռիտան:
«Այսօրվա թոշակը շատ քիչ է: Չգիտեմ ինչ եմ անելու, պատրաստվում եմ գոյատևել (ծիծաղում է): Մենք վարձով ենք տալիս մեր բնակարանը, ինչպես երևանցիներից շատերը: Եթե մենք միայն կենաթոշակով ապրեինք, ապա վաղուց մեռած կլինեինք»,- ասում է թոշակառու Սամվել պապը:
Իրավիճակը նույնն է նաև պետական ծառայողների դեպքում, նրանց մեծ մասը չի կարողանում միայն աշխատավարձով լուծել իր և ընտանիքի կենսական խնդիրները:
«Ի՞նչ կարող եմ ասել, իմ բացասական վերաբերմունքն այսպես, թե այնպես հասկանալի է: Հիմնականում ապրում եմ աշխատավարձով, երբեմն կողքից էլ եմ գումար վաստակում, բայց՝ շատ չնչին: Եթե մարդն ինձ պես 80 հազար դրամ աշխատավարձ է ստանում, ինքներդ էլ եք հասկանում, որ անգամ ինքն իրեն չի կարող պահել, ուր մնաց՝ ընտանիքին: Դա ծիծաղելի գումար է, հաջորդ տարի ես արդեն ավելի լուրջ խնդիրների առաջ կկանգնեմ, որովհետև գներն անընդհատ բարձրանում են»,- ասում է պետական ծառայող Արթուրը:
Լուսինեն աշխատում է երաժշտության ոլորտում, խոստովանում է, որ աշխատավարձից բացի, կարողնում է կողմնակի գումար վաստակել: «Առանց այդ հավելյալ գումարի, միայն աշխատավարձով ապրել հնարավոր չէ»,- ասում է նա:
Հայաստանի ֆինանսների փոխնախարար Պավել Սաֆարյանը խորհրդարանում բյուջեն ներկայացնելիս բացատրեց, որ աշխատավարձերն ու կենսաթոշակները 2016 թվականին չեն բարձրանա, քանի որ պետությունը պետք է փոխհատուցի 2015 թվականի օգոստոսի 1-ից թանկացած էլեկտաէներգիայի սակագնի ավելացված մասը:
«Նախորդ տարիներին աշխատավարձերն ու կենսաթոշակները բարձրանում էին, սակայն այժմ բյուջեի մուտքեր նվազել են, ինչի հետևանքով էլ միջոցները չեն բավականացնում աշխատավարձերն ու կենսաթոշակները բարձրացնելու համար: Միջազգային վարկանիշային կազմակերպությունները հայկական տնտեսության զրոյական աճ են կանխատեսում, ինչն իհարկե այնքան էլ գայթակղիչ չէ ներդրողների համար: Հենց դրանով էլ բացատրվում է միջոցների բացակայությունը»,- Sputnik Արմենիային ասաց տնտեսագետ Թաթուլ Մանասերյանը:
ՀՀ ֆինանսների նախարարության տվյալով՝ երկու տարի առաջ կառավարությունը բարձրացրել էր աշխատավարձերի ու կենսաթոշակների չափը՝ այդ նպատակի համար շուրջ 80 մլրդ դրամ հատկացնելով բյուջեից:
