ԵՐԵՎԱՆ, 20 նոյեմբերի — Sputnik. Ուղեղի կաթված ունեցող հայ երեխաների աջակցմանն ուղղված «Ժպտացող գույներ» բարեգործական համերգը տեղի կունենա դեկտեմբերի 1-ին Արամ Խաչատրյանի անվան պետական ֆիլհարմոնիայի համերգասրահում։
«Համերգին կմասնակցեն Էմմա Պետրոսյանը, Քրիստինե Պեպելյանը, Հայկ Պետրոսյանը, Ջուսը, Լիդուշիկը, Նանուլը, Միկան, Էլինա Չոլախյանը, Կարապետ Կարապետյանը, Զարուհի Բաբայանը իր երգի ստուդիայի սաների հետ և Սոֆի Դևոյանի մշակույթի կենտրոնի սաները», — Sputnik Արմենիա միջազգային մամուլի կենտրոնում կազմակերպված ասուլիսի ժամանակ հայտնեց համերգի կազմակերպիչ Ռուբինա Գրիգորյանը։
Նրա խոսքով` համերգի ողջ հասույթը փոխանցվելու է ուղեղի կաթվածի հաշմանդամություն ունեցող երեխաներին։
«Հայ մայրեր» բարեգործական ՀԿ-ի նախագահ Նարինե Մանուկյանն իր հերթին պատմեց, որ կազմակերպությունում գրանցված 160 երեխաները վերականգնողական բուժում են ստանում։ «Ոչ ոք ապահովագրված չէ, որ այդ խնդիր չի ունենա։ Մեզանից յուրաքանչյուրը պետք է օգնության ձեռք մեկնի` այդպիսով օգնելով, որ այդ մարդիկ ինտեգրվեն հասարակությանը», — առաջարկեց Մանուկյանը։
Նշենք, որ «Հայ մայրեր» բարեգործական ՀԿ-ն 2013 թվականից Երևանի քաղաքապետարանի հետ համատեղ իրականացնում է «Երևանի քաղաքապետարանը` Երևանի մանուկներին» բարեգործական ծրագիրը, որի շրջանակում 17 երևանաբնակ միայնակ մայրերի երեխաներ համալիր վերականգնողական բուժում են ստանում: 2014 թվականի մայիսին իրականացվել է հսկայածավալ ծրագիր (visit Armenia. Enjoy your Run. Help children.), որին մասնակցել են Մոսկվայից հրավիրված մի շարք հյուրեր:
Նախաձեռնության հեղինակն է «Հայ մայրեր» ՀԿ-ն, որը զբաղվում է ուղեղային կաթված ունեցող երեխաներով։ Կազմակերպիչներն են «ԱՄԿՈ ՓՐՈԴԱՔՇՆԸ», որին աջակցում է ՀՀ մշակույթի նախարարությունը։
