ԵՐԵՎԱՆ, 20 նոյեմբերի-Sputnik. 80-ամյա հոբելյանի կապակցությամբ Գալուստ Սահակյանը տիկնիկայինցիներին պատվոգրեր է շնորհել, նրանք էլ, որպես երախտագիտության նշան, փոխադարձ քայլ են կատարել ու ԱԺ խոսնակին նվիրել թատրոնի խորհրդանիշը հանդիսացող Անհաղթ աքլորի տիկնիկը:
Sputnik լրատվական պորտալի թղթակիցը հետաքրքրվեց, թե Թումանյանի անվան պետական տիկնիկային թատրոնի տնօրեն Ռուբեն Բաբայանն ինչ կարևորություն է տալիս պատվոգրերին ու կոչումներին, նա պատասխանեց, որ «թատրոնն իր ամբողջ ստեղծագործական կազմով աշխատում է ոչ թե պատվոգրերի, այլ հանդիսատեսի գնահատանքի համար»: Միաժամանակ նա չժխտեց, որ պետական մարմինների կողմից ուշադրության արժանանալը հաճելի է:
«80-ը լավ տարիք է, իր մեջ պարունակում է իմաստություն ու մանկամտություն, սակայն նշեմ նաև, որ այդ երկու հատկանիշները պարտադիր պիտի մի տեղում լինեն»,-կեսկատակ, կեսլուրջ պատմում է Ռուբեն Բաբայանը:
ԱԺ նախագահի պատվոգրին արժանացած դերասան, ռեժիսոր Կարեն Խաչատրյանի համար տիկնիկային թատրոնում աշխատելը պատվաբեր է ու հետաքրքիր:
«Ամեն անգամ, տեսնելով երեխաների փայլող աչքերն ու հիացական արձագանքները, հասկանում եմ, որ մեր առաքելությունը կատարված է: Մեր նպատակն է հաղորդակցվել հանդիսատեսի հետ, հուզել նրանց ու հարցեր առաջացնել»,-ոգևորված ներկայացնում է 18 տարի տիկնիկայինին նվիրած դերասանը:
Մեր երկու զրուցակիցներն էլ հաստատում են, որ Երևանի պետական տիկնիկային թատրոնը քայլում է ժամանակին համընթաց. անկախ տարիքից միշտ երիտասարդ է ու ինտերակտիվ:
