Մայա Պլիսեցկայան ոչ միայն տաղանդավոր, գեղեցիկ և նրբաճաշակ կին է, այլև` ռուսական բալետի խորհրդանիշը։ Սկսնակ պարուհիներից շատերի համար հենց նա է բալետի պարուհու չափանիշը։ Պարուհին մեծ ժառանգություն է թողել ոչ միայն որպես պրոֆեսիոնալ մարդ, այլև` որպես իմաստուն և նրբաճաշակ անձնավորություն։ Բազմաթիվ համաշխարհային քաղաքագետներ և դիվանագետներ խոնարհվում էին նրա առաջ, Պլիսեցկայան համարվում էր հանրահայտ Պիեր Կարդենի մուսան։ Այսօր նա իր երկրպագուների հետ կարող էր տոնել իր 90-ամյա հոբելյանը, սակայն համաշխարհային ճանաչում ունեցող պարուհին իր արկածներով լի կյանքին հրաժեշտ տվեց 2015 թվականի մայիսին։ Մեծ արտիստի ծննդյան օրվա կապակցությամբ Sputnik Արմենիան ներկայացնում է Մայա Պլիսեցկայայի ամենահետաքրքիր արտահայտությունների ընտրանին։
1. Ապագա սերունդնե՛ր, ձեզ եմ խորհուրդ տալիս։ Լսե՛ք ինձ։ Մի՛ համակերպվեք, մինչև վերջին կաթիլը մի՛ համակերպվեք։ Պայքարեք անգամ վերջին պահին… Մինչև վերջին րոպեն պայքարեք… Իմ հաղթանակների հիմքը միմիայն պայքարն է։ Բնավորությունը հենց ինքը ճակատագիրն է։
2. Կյանքն անարդար է տաղանդի նկատմամբ։ Սակայն բանաստեղծը, կոմպոզիտորն ու նկարիչը կհաղթահարեն դարերի ճամփան, եթե, իհարկե, նրանք մարտական են տրամադրված։
3. Երբեմն ինձ թվում է, որ սկզբում ծնվում է նախանձը, հետո նոր` մարդը։
4. Ես չեմ ներել իմ թշնամիներին և չեմ պատրաստվում ներել։ Հանուն ինչի՞։ Ինչի՞ համար ներեմ նրանց։ Ես համոզված եմ` մարդիկ չեն փոխվում։ Եվ թող իմանան, որ ես ոչինչ չեմ մոռացել և ոչինչ չեմ ներել։
5. Շքեղության մեջ ես երջանկություն չեմ տեսնում։ Շքեղությունը միայն հոգս է պատճառում։ Չէ՞ որ մեծ տուն ունենալու համար պետք է կարողանաս այն մաքուր պահել։
6. Ի սկզբանե բանն էր.. Այդպես է համարվում։ Իսկ ես կարծում եմ, որ ի սկզբանե շարժումն էր, քանի որ ժեստը բոլորն են հասկանում, իսկ խոսքը` ոչ բոլորը։
7. Տղամարդկանց միշտ գրավում է գեղեցիկ մարմինը։ Ես չեմ կարծում, որ պարուհիները նրանց իրենց խելքով են գերում։
8. Երբ բեմում մերկ մարդ եմ տեսնում, ուրախանում եմ և հաճույքից շփում ձեռքերս։ Չէ՞ որ մեզ ոչինչ չէին թույլատրում։ Ստացվում է, որ կոմունիստները մուշտակները հագին էին իրենց երեխաներին բեղմնավորում…
9. Որքան էլ փորձես, երկրորդ անգամ չես ծնվի։ Ապրի՛ր քեզ բաժին հասած կյանքը։
10. Սիրող մարդիկ վեր են առօրեականությունից, ճղճիմությունից։ Սիրահարները միշտ այլ հարթության մեջ են ապրում։
