Եվրոպական ավտոարշավի հայկական արդյունքը

ԵՐԵՎԱՆ, 20 նոյեմբերի– Sputnik. Հայկական ՏՀՏ ընկերությունների ներկայացուցիչներն ավտոարշավ  են անցկացրել Եվրոպայի քաղաքներում` վերադառնալով եվրոպական գործընկերների հետ համագործակցության մասին շուրջ 300 պայմանագրով։ Այդ մասին ուրբաթ մամուլի ասուլիսում հաղորդեցին կազմակերպիչները։

«Հայկական ՏՀՏ եվրոպական ավտոարշավ» ծրագիրն իրականացվել է հոկտեմբերի 4–ից նոյեմբերի 5–ը։ Ծրագրին մասնակցել են հայկական 26 ՏՀՏ ընկերությունների 36 պատվիրակներ։ ՏՀՏ ավտոարշավը ներառել է 18 երկիր։

Էկոնոմիկայի նախարարի տեղակալ Էմիլ Տարասյանը նշեց, որ դա ոչ միայն իրադարձություն է հայկական ընկերությունների համար, այլև լավ ձևաչափ` երկրում բարենպաստ ներդրումային միջավայր ստեղծելու համար, որը պետք է շարունակվի, այդ թվում` տնտեսության այլ ոլորտներում։

«Դա ոգևորիչ և գործնական քայլ է, մենք դեռ պետք է գնահատենք այդ նախաձեռնության արդյունավետությունը, տեսնենք` ինչպիսին են հաջողությունները։ Ես Կատովիցայում մասնակցել եմ հայ–լեհական համաժողովին, որտեղ հետաքրքրություն է առաջացել Հայաստանում համատեղ կապիտալով ձեռնարկություններ ստեղծելու գաղափարի նկատմամբ, որոնց արտադրանքը կարտահանվի նաև ԵՏՄ շուկաներ»,– ասաց Տարասյանը։

Technology & Science Dynamics ընկերության տնօրեն, ավտոարշավի ծրագրի հեղինակ Վահան Շաքարյանի խոսքով` իրենք վերադարձել են մեծ փորձով` ծանոթանալով տարբեր երկրներում գործընկերների աշխատանքին։

«Մենք նախատեսում ենք հաջորդ տարվա գարնանը նման արվտոարշավ կազմակերպել նաև ԱՄՆ–ում և Կանադայում»,– ասաց Շաքարյանը։

Ծրագրին պետական աջակցություն է ցուցաբերել Հայաստանի էկոնոմիկայի նախարարությունը` ԱԳՆ, սփյուռքի նախարարության, ՓՄՁ Զարգացման ազգային կենտրոնի և այլ կազմակերպությունների աջակցությամբ։