ԵՐԵՎԱՆ, 20 նոյեմբերի– Sputnik. Վերջին օրերին Փարիզի գրախանութներում սպառվել են Էռնեստ Հեմինգուեյի «Փարիզը տոն է, որը միշտ քեզ հետ է» գրքի բոլոր օրինակները, հայտնում է France Info-ն:
Ըստ կայքի` Հեմինգուեյի ստեղծագործությունն ամենապահանջվածը դարձավ այն բանից հետո, երբ մի քանի փարիզցիներ «Բատակլան» թատրոնի մոտ ծաղիկների հետ միասին դրեցին նաև «Փարիզը տոն է, որը միշտ քեզ հետ է» գրքի նմուշները։ Դրանից հետո Փարիզի գրախանութներում մի քանի օրվա ընթացքում սպառվեցին Հեմինգուեյի ստեղծագործության նմուշները, այս պահին այն հնարավոր չէ գտնել նույնիսկ Փարիզի գրադարաններում: Որոշ հրատարակչություններ ավելացրել են գրքի տպաքանակը, քանի որ խանութներից միայն այդ գիրքն են պահանջում:
Նշվում է նաև, որ վերջին շաբաթվա ընթացքում ահաբեկչության վայրերում ամենաշատ հնչող երաժշտությունը Վուդի Ալենի «Կեսգիշերը Փարիզում» ֆիլմի սաունդթրեքն է։
