ԵՐԵՎԱՆ, 18 նոյեմբերի — Sputnik. Մի շարք լրատվամիջոցներ այսօր` նոյեմբերի 18-ին, հայտնում են, որ նոյեմբերի 13-ին Փարիզում տեղի ունեցած ահաբեկչություններից հետո կորած համարվող 17-ամյա հայուհի Լոլա Ուզունյանը մահացել է, և այս մասին հայտնել է Ֆրանսիայի հայկական կազմակերպությունների համակարգող խորհրդի (CCAF) նախագահ Մուրադ Փափազյանը:
Փափազյանն ասել է, որ լուրը ծնողներին հայտնել են իրավապահները, ծնողները ճանաչել են աղջկա դին:
ՀՀ արտգործնախարարի մամուլի քարտուղար Տիգրան Բալայանը Sputnik Արմենիայի հետ զրույցում նշեց, որ Ֆրանսիայում Հայաստանի դեսպանատունը դեռ չի հաստատել այդ լուրը։
Աղջկա հուղարկավորության օրվա մասին առայժմ ոչինչ հայտնի չէ: Մուրադ Փափազյանի փոխանցմամբ, դեռեւս մի շարք փորձաքննություններ պետք է անցկացվեն:
Հիշեցնենք, որ Լոլա Ուզունյանը նոյեմբերի 13-ին հոր հետ գնացել էր Eagles of Death Metal խմբի համերգին: Ահաբեկիչները ներխուժել էին «Բատակլան» համերգասրահ, պատանդ վերցրել սրահում գտնվողներին: Ահաբեկչության ժամանակ ավելի քան 100 մարդ էր սպանվել, բազմաթիվ մարդիկ վնասվածքներ էին ստացել։ Լոլա Ուզունյանի հայրը խառնաշփոթի ժամանակ կորցրել էր դստերը, մեկ օր անց հայրը տուն էր հասել, իսկ Լոլայից այդպես էլ որևէ տեղեկություն չէր ստացել։ Հարազատները պարզել էին, որ Լոլա Ուզունյանը ընկերների մոտ չի ապաստանել:
Ուրբաթ երեկոյան Փարիզում միանգամից մի քանի ահաբեկչական գործողություն էր իրականացվել: Անհայտ անձինք կրակ էին բացել մայրաքաղաքի 10-րդ շրջանի ռեստորաններից մեկի ուղղությամբ, երեք պայթյուն էլ որոտացել էր «Սթադ դը Ֆրանս» մարզադաշտի անմիջական հարևանությամբ: Այդ պահին մարզադաշտում ընթանում էր Ֆրանսիա — Գերմանիա ֆուտբոլային հանդիպումը, որին ներկա էր նաև նախագահ Ֆրանսուա Օլանդը: Պայթյուն էր գրանցվել նաև «Բատակլան» թատրոնում, որտեղ անհայտ անձինք պատանդ էին վերցրել տասնյակ մարդկանց: Վերջին տվյալով՝ 129 մարդ է մահացել:
