ԵՐԵՎԱՆ, 17 նոյեմբերի- Sputnik. Charlie Hebdo ֆրանսիական երգիծական շաբաթաթերթի առաջին էջում Փարիզում տեղի ունեցած ահաբեկչական գործողությունների թեմայով նոր ծաղրանկար կտպագրվի։ Ամսագիրը վաճառքի կհանվի չորեքշաբթի առավոտյան։
Նկարում պատկերված մարդու ձեռքին բաժակ է և շամպայնի շիշ, խմիչքը շիթերով դուրս է թափվում նրա որովայնի և ոտքերի վրա եղած անցքերից, որոնք փամփուշտի թողած հետքեր են։ Ծաղրանկարի վրա գրված է. «Նրանք զենք ունեն։ Կորչեն նրանք գրողի ծոցը, մենք շամպայն ունենք»։
Ամսագրի գլխավոր էջի վերաբերյալ տեղեկությունը ներկայացնում է BFMTV հեռուստաալիքը։
Փարիզի ահաբեկչական գործողությունների մասին մեկ այլ ծաղրանկար էլ տպագրվել էր երեկ, կայքի «օրվա ծաղրանկար» բաժնում։ Նկարի վրա պատկերված են ուրվականներ` Ֆրանսիայի «կարծրատիպային» բնակիչների պատկերներով։ Ծաղրանկարում պատկերված մարդիկ բեղերով են, բերետներով, և թևատակի տակ ազգային բլիթ է դրված։ «Ֆրանսիացիները նորմալ կյանք են վերադառնում»,- գրված է ծաղրանկարի տակ։
Ուրբաթ երեկոյան Փարիզում միանգամից մի քանի ահաբեկչական գործողություն էր իրականացվել: Անհայտ անձինք կրակ էին բացել մայրաքաղաքի 10-րդ շրջանի ռեստորաններից մեկի ուղղությամբ, երեք պայթյուն էլ որոտացել էր «Սթադ դը Ֆրանս» մարզադաշտի անմիջական հարևանությամբ: Այդ պահին մարզադաշտում ընթանում էր Ֆրանսիա-Գերմանիա ֆուտբոլային հանդիպումը, որին ներկա էր նաև նախագահ Ֆրանսուա Օլանդը: Պայթյուն էր գրանցվել նաև «Բատակլան» թատրոնում, որտեղ անհայտ անձինք պատանդ էին վերցրել տասնյակ մարդկանց: Վերջին տվյալով՝ 129 մարդ է մահացել:
