ԵՐԵՎԱՆ, 17 նոյեմբերի-Sputnik. Նրանց հաղթանակի գինը զինվորի փրկված կյանքն է: Նրանք զինվոր են և բժիշկ: Նրանք թիկունքում են և առաջնագծում: Այսօր զինվորական բժշկի մասնագիտական տոնն է:
Մասնագիտական տոնի առթիվ շնորհավորեցինք ՊՆ ԿԿԶՀ վերականգնողական բաժանմունքի պետ, փոխգնդապետ Վահրամ Խոջայանին: Նա կարծում է, որ զինվորական բժիշկներն աշխարհի ամենախաղաղասեր մարդիկ են` անկախ ազգությունից:
Վահրամ Խոջայանը մասնակցել է ՀՀ հյուսիս-արևելյան սահմանների պաշտպանությանը: Այսօրվա պես հիշում է՝ սովորեց ԵՊԲՀ-ում, սերտեց բժշկական ծառայությունների կազմակերպման ու մարտավարության դասընթացներն ու դրանք գործնականում կիրառեց մարտադաշտում: Հիմա արդեն կեսկատակ, կեսլուրջ պատմում է. «93 թվականին խորը շունչ քաշեցի ու գնացի ծառայության: Վատ բան չեմ ուզում հիշել, լավ է, որ ողջ մնացի»:
Չնայած Խոջայանն ու նրա գործընկերներն աշխատել են արտակարգ իրավիճակում, երբ շուրջը ռումբեր էին պայթում, այնուամենայնիվ հումորի ժամանակ էլ էին գտնում:
«20 տարեկան գյումրեցի մի զինվորի ուղարկեցի գինեկոլոգի մոտ՝ ախտորոշելով եռամսյա հղիություն: Գյումրեցիները հղիներին ասում են «պատճառավոր», դրա համար էլ բառիս իմաստը չհասկացավ: Այս հաղթանդամ տղան իր ամբողջ բոյ-բուսաթն առած գնում է բժշկի մոտ ու ասում՝ ինձ կլինկորի են ուղարկել, ասում են՝ հղի եմ»,-պատմում է զինվորական բժիշկը:
Ի դեպ, անմոռանալի է նաև պատերազմի դաշտում կին բուժակների ներկայությունը: Նրանք տղամարդկանց հավասար մարդկային կյանքերի համար կռիվ են տվել ու զինվորների կողքին գիշերներ լուսացրել:
«Գալյա անունով բուժակին մինչև օրս չեմ մոռանում: 2 տղամարդու կարող էր խփել իրար, որ ուշքից գնային»,-հիշում է Վահրամ Խոջայանը:
Նույնիսկ խաղաղ պայմաններում զինվորական բժիշկը չի կորցնում իր տեմպն ու ռիթմը: Հիմա նա պատասխանատու է ոչ միայն զինվորների առողջության, այլև նրանց ծնողների ու բարեկամների հանգստության համար:
Գոհար Սարգսյան
