ԵՐԵՎԱՆ, 17 նոյեմբերի – Sputnik. Ամերիկացի հանրահայտ հաղորդավար, պրոդյուսեր Քոնան Օ՛Բրայենի «Կոնան» հեռուստաշոուն, որի նկարահանումները Հայաստանում իրականացվեցին հոկտեմբերին, եթեր կհեռարձակվի նոյեմբերի 17-ին, հայտնում է tert.am-ը։
Հիշեցնենք, որ ամերիկացի հայտնի հեռուստահաղորդավար, կատակերգու, սցենարիստ, պրոդյուսեր, երաժիշտ Քոնան Օ’Բրայենը` բազմաթիվ երեկոյան հումորային թոք-շոուների հաղորդավարը, հոկտեմբերին այցելել էր Հայաստան:
Շոումենն այստեղ նկարահանում էր իր առաջիկա հաղորդումը: Քոնան Օ’Բրայենը Հայաստան էր ժամանել իր օգնականի հետ, ով մեր հայրենակիցն է: Սոնա Մովսեսյանն առաջին անգամ էր հայրենիքում:
Քոնան Օ’Բրայենը Սոնայի հետ եղել է Հայաստանի գեղատեսիլ վայրերում, ներկա եղել Երևանի տոնի կապակցությամբ կազմակերպված միջոցառումներին, այցելել է Ծիծեռնակաբերդի Հայոց ցեղասպանության զոհերի հուշահամալիր։
Հայտնի հեռուստահաղորդավարը քայլել է Երևանի փողոցներով, հանդիպել մարդկանց, զրուցել և փորձել զգալ հայկական մշակույթը։
Նկարահնումներն իրականացվել էին Soar Productions ընկերության պրոդյուսերական նկարահանող խմբի օգնությամբ։
