ԵՐԵՎԱՆ, 16 նոյեմբերի-Sputnik. Փորձագետների կարծիքով՝ նոյեմբերի 4-ին Հարավային Սուդանում տեղի ունեցած ավիաաղետի պատճառը կամ տեխնիկական անսարքությունն էր, կամ էլ՝ գերբեռնվածությունը։
Sputnik լրատվական պորտալի թղթակիցը զրուցեց օդաչու, ՀՀ առաջին մասնավոր ավիաընկերություններից մեկի՝ «Ֆենիքս Ավիայի» հիմանդիր Հակոբ Ճաղարյանի հետ։ Վերջինը, լինելով նաև Հայաստանում օդային աղետների հետաքննություններ իրանացնող միակ մասնագետը, վստահեցրեց, որ աղետը տեղի է ունեցել շարժիչի խափանման հետևանքով։
Մինչդեռ ԽՍՀՄ վաստակավոր օդաչու Դմիտրի Ադբաշյանն այլ կարծիք ունի։
«Ընկերությունում, որտեղ աշխատել են մեր հայրենակիցները, ոչ մի օրենք չի գործում։ Մերոնք գնացել էին Հարավային Սուդան մի կտոր հացի փող աշխատելու։ Շատ պրոֆեսիոնալ տղաներ էին ու լավ գիտեին, որ օդանավը գերբեռնված է, պարզապես այլ տարբերակ չեն ունեցել։ Կոպիտ ասած՝ նրանց հրամայել են՝ փող ենք տալիս, ցրեք»,-մեկնաբանեց Ադբաշյանը։
Մասնագետները պատմեցին, որ ԱՆ-12 օդանավն ամբողջ բեռով ու վառելանյութով հանդերձ պետք է կշռի առավելագույնը 61 տոննա։ Հարավային Սուդանի մայրաքաղաք Ջուբայից մինչև հյուսիսում գտնվող Սալուջ հասնելու համար, համապատասխան հաշվարկներով, անձնակազմին պետք կգար 10-11 տոննա նավթ, այն դեպքում, երբ ինքնաթիռը կշռում է 35 տոննա։ Փորձագետներին մնում է պարզապես տեղեկանալ, թե քանի տոննա բեռ են փոխադրել: Միայն այդ դեպքում պարզ կդառնա՝ օդանավը գերբեռնվա՞ծ է եղել, թե՞ ոչ։
Այս տեղեկությամբ ամեն ինչ չի ավարտվում։ Հետաքննությունը դեռ պետք է պարզի, թե որ երկրում է գրանցված օդանավը։
Մի հարցում մեր երկու զրուցակիցները համակարծիք են. օդանավի անձնակազմի վեց անդամներն «իրենց գործի գիտակ մասնագետներ էին ու մեծատառով մարդիկ»։
Օրինակ` երկրորդ օդաչու Սամվել Համբարձումյանն արցախյան ազատամարտի տարիներին շուրջ 1000 անգամ մեկնել է Ստեփանակերտ ու զենք-զինամթերք, վառելանյութ տեղափոխել։ Անհրաժեշտության դեպքում էլ վիրավորների է բերել Երևան։ Ու սա այն դեպքում, երբ ադրբեջանական կործանիչները պտտվում էին երկնքում։ Համբարձումյանը 15-16 հազար ժամ օդային թռիչք է իրականացրել ։ Այս թվերն առավել քան խոսուն են։
Օդաչուները մեծ հիացմունքով խոսեցին նաև ազգությամբ ռուս ղեկապետ Մաքսիմ Վոլկովի մասին, ով գերազանց տիրապետում էր օտար լեզուների և շատ կազմակերպված մասնագետ էր։
Հիշեցնենք, որ նոյեմբերի 4-ին Հարավային Սուդանում բեռնատար օդանավը թռիչքից կարճ ժամանակ անց վթարային վայրէջք կատարեց ու կործանվեց։ Անձնակազմի 6 անդամներից ու 12 ուղևորներից ողջ մնացին 3-ը։
Անձնակազմի 6 անդամներից 5-ը հայեր էին:
Գոհար Սարգսյան
