ԱԳՆ. Հայաստանից Եվրոպա մեկնելու արգելքի հարցը չի քննարկվում

ԵՐԵՎԱՆ, 16 նոյեմբերի – Sputnik. Հայաստանը դեռ արգելքներ չի մտցնում` սահմանափակելու համար Եվրոպա մեկնելու ցանկություն ունեցող իր քաղաքացիների տեղաշարժը, Sputnik Արմենիա պորտալին ասաց ՀՀ ԱԳՆ մամուլի քարտուղար Տիգրան Բալայանը։

Ավելի վաղ ԶԼՄ–ում տեղեկություն էր հայտնվել այն մասին, որ ՌԴ ԱԳՆ–ն սկսել է մշակել դեպի Եվրոպա ուղևորությունների վերաբերյալ արգելքներ կիրառելու հանձնարարականները` կապված Փարիզում տեղի ունեցած ահաբեկչության հետ, որի հետևանքով զոհվել է 129 մարդ։

Ավելի ուշ ՌԴ ԱԳՆ ղեկավարի տեղակալ Օլեգ Սիրոմոլոտովը նշել է, որ դեռևս խոսք չկա ՌԴ քաղաքացիներին Եվրոպա մեկնելու արգելքի մասին` կապված Փարիզի դեպքերի հետ, սակայն նման հարց մշակվում է։ Նա ավելացրել է, որ արգելքը մտցնում է ոչ թե ԱԳՆ–ն, այլ երկրի նախագահը, սակայն ներկա պահին իրավիճակը եվրոպական երկրների հետ ավիահաղորդակցության դադարեցում չի պահանջում։

Ավելի վաղ ՌԴ նախագահ Վլադիմիր Պուտինը կարգադրել էր նոյեմբերի 6-ից արգելել Ռուսաստանի և Եգիպտոսի միջև ավիփոխադրումներ իրականացնել։

Ռուսական և խորհրդային ավիացիայի պատմության մեջ խոշորագույն ավիավթարը տեղի է ունեցել հոկտեմբերի 31-ին։ «Կոգալիմավիա» ավիաընկերության` Շարմ էլ Շեյխ – Սանկտ Պետերբուրգ 9268 թռիչքն իրականացնող Airbus-321 օդանավը կործանվել էր Սինայի թերակղզու տարածքում: Ինքնաթիռում եղել է 224 ուղևոր և անձնակազմի 7 անդամ: Բոլորը զոհվել են։ Դրանից հետո Ռուսաստանն ու մի շարք այլ երկրներ, Մեծ Բրիտանիան ներառյալ,  դադարեցրել են թռիչքներ իրականացնել դեպի Եգիպտոս։