ԵՐԵՎԱՆ, 16 նոյեմբերի – Sputnik. Ոստիկանությունը ճշտում է տեղեկությունը Մոլդովայի կառավարությունում տեղադրված ռումբի վերաբերյալ, Sputnik–ին հայտնել է Քիշնևի ոստիկանության տեսչության մամուլի քարտուղար Ադրիան Ժովմիրը, հաղորդում է Sputnik Մոլդովան։
Նրա խոսքերով` ժամը 13։15-ին անհայտ անձ է զանգահարել 902 համարին։
«Զանգողը տղամարդ է եղել, խոսել է ռուսերեն։ Նա հայտնել է, որ կառավարության շենքը կպայթի։ Նշված վայր են մեկնել ոստիկանության և հրշեջ ծառայության աշխատակիցները։ Ներկա պահին ստուգվում են շենքի բոլոր գրասենյակներն ու տարվում են անվտանգությունն ապահովելու համար բոլոր միջոցառումները», – ասել է Ժովմիրը։
Ոստիկանության ներկայացուցիչը հայտնել է, որ զանգողի խոսելաձևը վկայում է այն մասին, որ մարդն ակնհայտորեն անառողջ է կամ անմեղսունակ։
Ներկա պահին մայրաքաղաքում Պուշկինի փողոցի կողմից հերթապահում է հրշեջ ավտոմեքենան։ Ոստիկանները շղթայել են շենքը։ Հայտնում են, որ կառավարության շուրջ 500 աշխատակիցներ տարհանվել են։
