ԵՐԵՎԱՆ, 16 նոյեմբերի– Sputnik. Բելգիական իշխանությունները դիտարկում են մի շարք մզկիթներ փակելու հնարավորությունը, որպեսզի խուսափեն երիտասարդության վրա արմատական քարոզիչների ազդեցությունից, հայտարարել է երկրի վարչապետ Շառլ Միշելը։
Ելույթ ունենալով RTL հեռուստաալիքի եթերում` վարչապետը նշել է, որ իշխանությունները մտադիր են գործողությունների պլան առաջարկել Բրյուսելի խնդրահարույց շրջաններում, որտեղ, քննության տեղեկատվության համաձայն, նախապատրաստվել է Փարիզում տեղի ունեցած ահաբեկչությունների մի մասը։ Ինչպես պարզվել է, երկու մահապարտները բնակվել են Բրյուսելի կենտրոնական համայնքում և բրյուսելյան Մոլենբեկ համայնքում։ Մոլենբեկի ևս մեկ բնակիչ հետախուզվում է ֆրանսիական իշխանությունների կողմից։
«Ես հանձնարարել եմ անվտանգության ծառայություններին Մոլենբեկում, և ոչ միայն այնտեղ, ավելի խիստ միջոցներ ձեռնարկվել»,– ասել է վարչապետը։
Պատասխանելով այն հարցին, թե ենթադրու՞մ է դա արդյոք մի շարք մզկիթների փակում, նա ասել է. «Այո, իհարկե, դա տարբերակներից մեկն է։ Պետք է պայքարել ատելության քարոզիչների դեմ, պաշտպանել մարդկանց այն անձանցից, որոնք բռնության կոչ են անում»։
Ուրբաթ երեկոյան Փարիզում միանգամից մի քանի ահաբեկչական գործողություն էր իրականացվել: Անհայտ անձինք կրակ էին բացել մայրաքաղաքի 10-րդ շրջանի ռեստորաններից մեկի ուղղությամբ, երեք պայթյուն էլ որոտացել էր «Սթադ դը Ֆրանս» մարզադաշտի անմիջական հարևանությամբ: Այդ պահին մարզադաշտում ընթանում էր Ֆրանսիա-Գերմանիա ֆուտբոլային հանդիպումը, որին ներկա էր նաև նախագահ Ֆրանսուա Օլանդը: Պայթյուն էր գրանցվել նաև «Բատակլան» թատրոնում, որտեղ անհայտ անձինք պատանդ էին վերցրել տասնյակ մարդկանց: Վերջին տվյալներով՝ 129 մարդ է մահացել:
Վարչապետ. Բելգիան կարող է փակել մի շարք մզկիթներ
Բաժանորդագրվել
Բելգիայի իշխանությունները մտադիր են պայքարել արմատական քարոզիչների դեմ. հայտարարել է երկրի վարչապետ Շառլ Միշելը և ենթադրել, որ մի շարք մզկիթներ կփակվեն
