ԵՐԵՎԱՆ, 16 նոյեմբերի- Sputnik. Համագործակցության ռուս-թուրքական խորհուրդը կանցկացվի դեկտեմբերի 15-ին։ Երկու երկրների նախագահները` Վլադիմիր Պուտինն ու Թայիփ Էրդողանը, գագաթնաժողովի անցկացման շուրջ պայմանավորվածության են եկել Անթալիայում G20-ի երկրների առաջնորդների հանդիպման ժամանակ։
Մոսկվայում Թուրքիայի դեսպան Ումիտ Յարդիմը հոկտեմբերին հայտարարել էր, որ Էրդողանը նախատեսում է հանդիպել Պուտինի հետ դեկտեմբերի վերջին Կազանում։
Երկու երկրների առաջնորդների հանդիպումն անցել է փակ ռեժիմով և տևել մոտավորապես մեկ ժամ։ Հանդիպմանը ներկա են եղել նաև ՌԴ ԱԳՆ ղեկավար Սերգեյ Լավրովը, Թուրքիայի արտգործնախարար Ֆերիդուն Սինիրլիօղլուն, էներգետիկայի նախարար Ալի Ռիզա Ալաբոյունը և թուրքական հետախուզական կազմակերպության ղեկավար Հաքան Ֆիդանը։
Հանդիպումից առաջ, երբ լրագրողները լուսանկարել են առաջնորդներին, Էրդողանը հարցրել է Պուտինին, թե ինչպես է անցել նրա հանդիպումը Գերմանիայի կանցլեր Անգելա Մերկելի հետ։ Պուտինը ժպտացել է և անգլերեն պատասխանել. Good, very good։
G20-ը միավորում է աշխարհի խոշորագույն զարգացած և զարգացող տնտեսությունները, որոնց բաժին է ընկնում համաշխարհային ՀՆԱ-ի 85 տոկոսը։ 2013թ.-ին G20-ը նախագահել է Ռուսաստանը, 2014թ.-ին` Ավստրալիան, 2015թ.-ին` Թուրքիան։
