ԵՐԵՎԱՆ, 16 նոյեմբերի- Sputnik. Արգենտինայի ԿԳ նախարարությունն ու Հարավային Ամերիկայի Հայ Ազգային խորհուրդը կներկայացնեն «Հայերի ցեղասպանություն. Հարցեր, պատասխաններ և դասավանդման առաջարկներ» գիրքը։
Գիրքը կներկայացվի նոյեմբերի 17-ին հանրապետության կրթության նախարարությունում։ Այնտեղ Արգենտինայի կրթական Canal Encuentro ալիքը նաև հաղորդում կցուցադրի Հայերի ցեղասպանության վերաբերյալ։
Միջոցառմանը կմասնակցի Արգենտինայի կրթության նախարար Ալբերտո Սիլեոնին, ինչպես նաև` խտրականության, այլատյացության և ռասիզմի դեմ ազգային ինստիտուտի աշխատակից Պեդրո Մուրատյանը, Բուենոս Այրեսում «Աննա Ֆրանկի տուն» մշակութային կենտրոնի տնօրեն Հեկտոր Շալոմը և ուրիշներ։
Ավելի վաղ՝ 2015թվականի հուլիսին, Արգենտինայի Canal Encuentro ալիքը Հայ ազգային խորհրդի կողմից պարգևատրվել էր «Հրանտ Դինք» մրցանակով։
Նշենք, որ 1990թ.-ին Պլազոլետա Մոնտե Արարատ շրջանում, Մայր Աստվածածին տաճարից ոչ հեռու, Պալերմո թաղամասում հայկական համայնքի աջակցությամբ տեղադրվել է Ծիծեռնակաբերդի հուշահամալիրի կնկօրինակը։ 2007թ.-ին Արգենտինան ընդգրկվել է այն երկրների ցանկում, որոնք ճանաչել և դատապարտել են Հայոց ցեղասպանության փաստը։
