Սերժ Թանկյանն ահաբեկիչներին վախկոտ է անվանում

ԵՐԵՎԱՆ, 15 նոյեմբերի – Sputnik. Աշխարհահռչակ «System of a Down» (SOAD) ռոք խմբի մենակատար Սերժ Թանկյանն Instagram-ի իր էջում մեկնաբանել է Փարիզում ու Լիբանանում տեղի ունեցած ահաբեկչությունները։
 
«Մեր սերն ու աղոթքներն ուղղված են բոլոր նրանց, ովքեր տուժել են Փարիզում ու Լիբանանում տեղի ունեցած սարսափելի իրադարձություններից։ Նրանք, ովքեր հարձակվում են անմեղ մարդկանց վրա համերգի ժամանակ, ռեստորաններում, սրճարաններում, խանութներում, մշակութային վայրերում, վախկոտներ են։ Ես պարզապես չեմ կարողանում չմտածել բոլոր նրանց մասին, ովքեր մասնակցում էին Eagles of Death Metal-ի համերգին», —  գրել է երաժիշտը։

Նոյեմբերի 13-ի երեկոյան Փարիզում միանգամից մի քանի ահաբեկչական գործողություն էր իրականացվել: Անհայտ անձինք կրակ էին բացել մայրաքաղաքի 10-րդ շրջանի ռեստորաններից մեկի ուղղությամբ, երեք պայթյուն էլ որոտացել էր «Սթադ դը Ֆրանս» մարզադաշտի անմիջական հարևանությամբ: Այդ պահին մարզադաշտում ընթանում էր Ֆրանսիա-Գերմանիա ֆուտբոլային հանդիպումը, որին ներկա էր նաև նախագահ Ֆրանսուա Օլանդը: Պայթյուն էր գրանցվել նաև «Բատակլան» թատրոնում, որտեղ անհայտ անձինք պատանդ էին վերցրել տասնյակ մարդկանց: Վերջին տվյալով՝ 129 մարդ է մահացել: