ԵՐԵՎԱՆ, 15 նոյեմբերի — Sputnik. Ահաբեկչության սպառնալիքներին հակազդելու միակ միջոցն ուժերի համախմբումն է, հայտարարել է ՌԴ նախագահ Վլադիմիր Պուտինը:
«Քաջ գիտակցում ենք, որ ահաբեկչության վտանգի դեմ պայքարելու և տներից զրկված միլիոնավոր մարդկանց օգնելու միակ միջոցը միջազգային հանրության ուժերի համախմբումն է», — ԲՌԻԿՍ երկրների առաջնորդների ոչ պաշտոնական հանդիպման ժամանակ ասել է Պուտինը:
ՌԴ նախագահն անդրադարձել է նաև Փարիզում տեղի ունեցած ահաբեկչություններին:
«Ցավակցում ենք տուժածներին, մենք մշտապես հայտարարում ենք, որ ահաբեկչության դեմ արդյունավետ պայքարի գրավականն ուժերի համախմբումն է», — նշել է նախագահը:
Նա նաև ընդգծել է, որ անհրաժեշտ է գործել ՄԱԿ-ի կանոնադրության համաձայն` հիմնվելով միջազգային նորմերի վրա և հարգելով յուրաքանչյուր պետության օրինական շահերն ու ինքնիշխանությունը:
Պուտինը հիշեցրել է, որ այս հիմնական դրույթները նշված են ԲՌԻԿՍ-ի՝ 2015 թվականին ընդունված հռչակագրում:
