ԵՐԵՎԱՆ, 15 նոյեմբերի — Sputnik. ԱՄՆ-ի նախագահի թեկնածու Հիլարի Քլինթոնը հայտարարել է, որ մտադիր է թարմացնել ահաբեկիչների դեմ պատերազմելու որոշումը, որն ընդունել էր ամերիկյան կոնգրեսը:
«Մենք ռազմական ուժերը ահաբեկիչների դեմ օգտագործելու թույլտվություն ունենք: Այդ որոշումը մենք կայացրել ենք սեպտեմբերի 11-ի դեպքերից հետո», — ասել է Քլինթոնը: Նրա խոսքով` այդ թույլտվության մեջ «ակնհայտորեն ներառվում է» նաև «Իսլամական պետություն» ահաբեկչական խմբավորման դեմ պայքարը:
«Ես ուզում եմ այն (թույլտվության մասին որոշումը) թարմացնել», — նշել է Քլինթոնը: «Պետք է այն անցկացնել կոնգրեսով: Ես գիտեմ, որ Սպիտակ տունը աշխատում է կոնգրեսի անդամների հետ: Գուցե հնարավոր լինի փաստաթուղթը հիմա այնպես անցկացնել, որ կարողանանք թարմացնել ու ներառել բոլոր անհրաժեշտ գործիքները, այն ամենն, ինչ ունենք մեր զինանոցում, որպեսզի աշխատենք մեր դաշնակիցների և բարեկամների հետ, ինչպես նաև ավելի որակյալ հետախուզական տվյալներ կարողանանք տրամադրել», — ավելացրել է նա:
Նյու Յորքում 3 հազար մարդու կյանք խլած ահաբեկչություններից երկու օր անց` 2001 թվականի սեպտեմբերի 14-ին, ԱՄՆ-ի կոնգրեսը նախագահին թույլ տվեց ահաբեկիչների դեմ պայքարում ռազմական ուժերն օգտագործել սեփական հայեցողությամբ:
