ԵՐԵՎԱՆ, 14 նոյեմբերի — Sputnik. Մեկը կանգնած է դրամարկղի մոտ` սպասելով գումարի վերադարձին, քիչ հեռու աղջիկը զգեստ է ընտրում` հավանաբար իր կյանքի կարևոր իրադարձության նախաշեմին: Մյուսը վայելում է հենց նոր արված պատվերը, իսկ այդ ժամանակ «Ստադ դե Ֆրանս» մարզադաշտում մի խումբ մարդիկ նկարում են «ֆուտբոլ» անունը կրող արվեստի ձևերից մեկը: Մեկ ուրիշը «Բատակլան» համերգասրահում ձայնի ողջ ուժգնությամբ կատարում է իր ամենասիրած գործը` անգամ չենթադրելով, որ շատ քիչ է մնացել երգելու համար…
Իրադարձությունները, որոնք նախօրեին տեղի ունեցան Փարիզում, հերթական մարտահրավերը նետեցին մարդկությանը և վերաբերեցին շատերին։ Համաշխարհային նորաձևության և արվեստի մայրաքաղաքը, ժամանակակից Եվրոպայի քաղաքական կենտրոններից մեկը մի պահ ողողվեց արյունով։ Sputnik-ը Ֆրանսիայի ժամանակակից պատմության այս հերթական ողբերգական էջը խնդրեց մեկնաբանել ՀՀ արվեստագետներին:
Փարիզյան ողբերգությունը խորապես ցնցել է կոմպոզիտոր Տիգրան Մանսուրյանին. «Սարսափելի է, երբ չարությունը շատանում է աշխարհում: Խորապես ցավում եմ, որ առավոտից չկարողացա գնալ Հայաստանում Ֆրանսիայի դեսպանատան մոտ և ծաղիկներ դնել: Ես ցնցված եմ մարդու` սեփական քաղաքում, իր սովորական վիճակում այս աստիճան անպաշտպան լինելու համար: Առավել ևս Փարիզում` քաղաքակրթության կենտրոններից մեկում… Սա բարբարոսություն է»:
«Արվեստների պատկերասրահ» մշակութային հիմնադրամի նախագահ Մարիամ Շահինյանի խոսքերով` հենց արվեստը, ինչպես գեղեցկությունը, կփրկի աշխարհը: «Սա աղետ, ողբերգություն է ոչ միայն Ֆրանսիայի, այլև ողջ աշխարհի համար: Այս ողբերգությունը յուրաքանչյուր մարդու ողբերգությունն է, որը կարող է պատահել մեզնից յուրաքանչյուրի հետ: Ես ինքս բազմաթիվ ընկերներ ունեմ Փարիզում… Կարծում եմ, որ արվեստը պետք է հակաթույն ծառայի այն ամենի համար, ինչ տեղի է ունենում: Արվեստի բոլոր գործիչները պետք է իրենց վերաբերմունքն արտահայտեն ահաբեկչության նկատմամբ` մարդկությանը հասցնելով այն, ինչ տեղի է ունենում աշխարհում»:
