ԵՐԵՎԱՆ, 13 նոյեմբերի – Sputnik. Բեյրութում գրանցված երկու պայթյունների հետևանքով տուժածների թվում ՀՀ քաղաքացիներ կամ հայեր չկան, հայտնում է Հայաստանի արտաքին գործերի նախարարությունը` հղում անելով Լիբանանում ՀՀ դեսպանությանը։
Նախօրեին Բեյրութի արվարձանի հարավային շրջաններից մեկի բանուկ փողոցում մահապարտները երկու ահաբեկություն են իրականացրել։ Երկու ահաբեկիչներ յոթ րոպեի տարբերությամբ պայթեցրել են իրենց Բեյրութի հարավային արվարձան Բուրջ ալ Բարաժնե շրջանի բանուկ փողոցում։ Երկրորդ պայթյունը որոտացել է այն պահին, երբ քաղաքացիները սկսել են օգնել պայթյունից տուժածներին։
Լիբանանի ԶԼՄ–ների հաղորդման համաձայն` Բեյրութում իրականացված երկու պայթյունների հետևանքով զոհվածների թիվը հասել է 43-ի, և այդ թիվն աճում է։ Պայթյունից վիրավորվել է 239 մարդ: Պայթյունների պատասխանատվությունը ստանձնել է «Իսլամական պետություն» ծայրահեղական խմբավորումը:
Լիբանանի վարչապետ Թամմամ Սալամին ցավակցություն է հայտնել նաև Հայաստանի նախագահ Սերժ Սարգսյանը։
«Խստորեն դատապարտում ենք այդ անմարդկային ահաբեկչական գործողությունը, որի նպատակը ինչպես Լիբանանում, այնպես էլ տարածաշրջանում կայունության և անվտանգության խաթարումը»,- ասված է ուղերձում։
«Իսլամական պետություն» ահաբեկչական խմբավորումն այսօր համաշխարհային անվտանգության գլխավոր սպառնալիքներից է։ Երեք տարվա ընթացքում ահաբեկիչներին հաջողվել է զավթել Իրաքի և Սիրիայի տարածքների զգալի մասը, նրանք փորձում են իրենց ազդեցությունը տարածել Հյուսիսային Աֆրիկայում, մասնավորապես` Լիբիայում։ Տարբեր գնահատականներով` ԻՊ–ի վերահսկողության տակ է գտնվում շուրջ 90 հազար ք/կմ տարածք։ Ահաբեկչական կազմակերպության անդամների թվի մասին տվյալները տատանվում են 50-200 հազարի միջև։
