ԵՐԵՎԱՆ, 13 նոյեմբերի – Sputnik. «Զվարթնոց» օդանավակայանի մամուլի քարտուղար Գևորգ Աբրահամյանը Sputnik Արմենիա պորտալի հետ զրույցում հերքեց որոշ փորձագետների հայտարարությունները, թե օդանավակայանում սպասարկման գները շատ բարձր են։
Երեքշաբթի միջազգային չվերթերի էժան տոմսերի վաճառք սկսած ռուսական «Պոբեդա» ավիաընկերության մամուլի քարտուղար Ելենա Սելիվանովան հինգշաբթի Sputnik պորտալին հայտնեց, որ այժմ իրենք դիտարկում են տարբեր ուղղություններով միջազգային չվերթեր իրականացնելու հարցը, սակայն մոտ ապագայում դեպի Երևան թռիչքներ չեն նախատեսվում։ Որոշ փորձագետներ նման ծրագրերի բացակայությունը կապեցին անմրցունակ հայկական շուկայի հետ, ինչպես նաև «Զվարթնոց» օդանավակայանում առկա սպասարկման բարձր գների հետ։
«Ես ծանոթ չեմ նրանց հայտարարություններին, սակայն չեմ կարծում, թե նրանք էլ, իրենց հերթին, ծանոթ են օդանավակայանի գներին։ «Պոբեդայի» հայտարարությունը` կապված դեպի Երևան չվերթեր իրականացնելու հետ, ես մեկնաբանել չեմ կարող», – ասաց Աբրահամյանը։
ԱՊՀ անդամ երկրների քաղաքացիական ավիացիայի «Աերոպորտ» ասոցիացիայի գլխավոր տնօրեն Վիկտոր Գորբաչյովն ավելի վաղ, մեկնաբանելով «Պոբեդայի» ծրագրերում դեպի Հայաստան թռիչքների բացակայությունը, հայտնել էր, որ երկրում ավիատոմսերի գների իջեցում կարելի է սպասել միայն այն ժամանակ, երբ դեպի Երևան թռիչքներ կսկսեն իրականացնել առնվազն երեք կամ չորս ռուսական ավիաընկերություններ։ «Ավիապորտ» գործակալության վերլուծական ծառայության ղեկավար Օլեգ Պանտելեևն իր հերթին ավելացրեց, որ խնդիրը հետևյալն է` Հայաստանի և Ռուսաստանի ավիացիոն իշխանությունները պետք է համաձայնեցնեն Մոսկվա–Երևան ուղղությամբ չվերթեր իրականացնելու իրավունք ունեցող ավիաընկերությունների քանակը։
Մեկնաբանելով Պանտելեևի հայտարարությունը` Աբրահամյանը նշեց, որ վերջերս հրատարակված ուսումնասիրության մեջ նշվում է, որ «Զվարթնոց» օդանավակայանը տարածաշրջանի ամենաէժան օդանավակայանն է։
«Օդանավակայանում կոնկրետ թվերով հստակ հաշվարկ է արվել։ Ինչ վերաբերում է տոմսերի գներին, ապա դրանք որոշում են ավիաընկերությունները, և օդանավակայանը դրանց չի մասնակցում։ Մինչ օրս օդանավակայանի գներից, բացի Միխայիլ Բաղդասարովից (սնանկացած «Արմավիա» ավիաընկերության նախկին սեփականատեր), ոչ ոք չի բողոքել», – ասաց Աբրահամյանը։
Ավելի վաղ hetq.am–ի հետ զրույցում վերջերս բացված «Ալյանս» ավիաընկերության ղեկավար Արարատ Սարգսյանը ավիաընկերության գործունեությունը սկսելու համար լուրջ խնդիր է նշել հենց «Զվարթնոց» օդանավակայանի գները։ Նրա խոսքով` եթե «Զվարթնոց» օդանավակայանում մեկ անձի առևտրային սպասարկումն արժե 24.3 եվրո, ապա նույն Թբիլիսիում այն կազմում է 10 դոլար, և այն մտնում է տոմսի արժեքի մեջ։
