ԵՐԵՎԱՆ, 13 նոյեմբերի– Sputnik. Հարավային Սուդանում տեղի ունեցած ավիավթարի հետևանքով մահացած հայերի աճյունները հինգշաբթի ուշ երեկոյան տեղափոխեցին Երևան։
Նոյեմբերի 4-ի առավոտյան Հարավային Սուդանում վթարի էր ենթարկվել Ան-12 տրանսպորտային ինքնաթիռը։ Նախնական տվյալով` այն ընկել էր թռիչքուղուց 800 մետր բարձրության վրա։ Հարավային Սուդանի նախագահի ներկայացուցչի խոսքով` Ան–12 ինքնաթիռում գտնվող 18 ուղևորից փրկվել էին երեքը, բոլորը` Հարավային Սուդանի քաղաքացիներ։ Վթարի հետևանքով մահացել էին ինքնաթիռի անձնակազմի անդամները` Հայաստանի հինգ քաղաքացի և մեկ ռուսաստանցի։ Փրկարարաներն աղետի վայրում 36 դիակ էին գտել։
Զոհվածների մարմինները չարթերային չվերթով Հարավային Սուդանի մայրաքաղաք Ջուբայից տեղափոխել են Երևան։
Կործանված ինքնաթիռի անձնակազմի անդամներն են` հրամանատար Գևորգ Թովմասյանը, երկրորդ օդաչու Սամվել Համբարձումյանը, բորտինժեներ Սամվել Մկրտչյանը, ավիատեխնիկ Արմեն Անտոնյանը և Սուրեն Պետրոսյանը
Անձնակազմում նաև ռուս օդաչու է եղել, որի աճյունը նույն չվերթով տեղափոխվել է Մոսկվա։ Այս մասի հայտնում է news.am կայքը։
Հայաստանի ԱԳՆ ղեկավար Էդվարդ Նալբանդյանը նոյեմբերի 9–ին Երևանում ՌԴ ԱԳՆ ղեկավար Սերգեյ Լավրովի հետ համատեղ մամուլի ասուլիսի ժամանակ շնորհակալություն է հայտնել Ռուսաստանին Հայաստանի քաղաքացիների մարմինների տարհանման հարցում օգնություն ցուցաբերելու համար։
