«Նաիրիտի» աշխատողները բողոքի ցույց են անցկացնում ՀՀ էներգետիկայի նախարարության շենքի դիմաց

ԵՐԵՎԱՆ, 12 նոյեմբերի– Sputnik. «Նաիրիտ» գործարանի մի քանի տասնյակ աշխատողներ բողոքի ցույց են անցկացնում Հայաստանի էներգետիկայի և բնական պաշարների նախարարության շենքի մոտ։ Նրանք պահանջում են վերագործարկել գործարանը։ Աշխատողներից մեկը` Ալվինա Դավթյանը, Sputnik Արմենիա պորտալին հայտնել է, որ մարդիկ հավաքվել են` պահանջելով տոկոսներ վճարել ուշացած աշխատավարձի համար և վերագործարկել գործարանը։

«Աշխատողները պահանջում են վճարել տոկոսները, բայց նաև նրանք պատրաստ են հրաժարվել այդ վճարումներից, եթե գումարներ ներդրվեն «Նաիրիտի» գործարկման գործում»,– ասաց Դավթյանը։ Նրա խոսքով` էներգետիկայի և բնական պաշարների նախարար Երվանդ Զախարյանի անունով նամակ է հանձնվել, որտեղ շարադրված են հավաքվածների պահանջները։ «Նամակում նշված է նաև գումարը, որն անհրաժեշտ է գործարանի վերագործարկման համար, այն կազմում է 60 մլն դոլար»,– ասաց Դավթյանը։

Աշխատավարձի պարտքերը 5,3 մլրդ դրամ են կազմում(շուրջ 11 մլն դոլար)։ Կառավարության շենքի  և նախագահի նստավայրի մոտ բազմաթիվ բողոքի ցույցեր են անցկացվել։ «Նաիրիտի» աշխատողների խոսքով` իրենց խոստացել են մարել աշխատավարձի պարտքերն այն դեպքում, եթե նրանք հրաժարվեն աշխատավարձի ուշացման համար տուգանքներից։ Դրանք վերջնականապես վճարվել են 2015թ.–ի օգոստոսի սկզբին։

ԽՍՀՄ–ի տարիներին «Նաիրիտը» քլորոպրենային կաուչուկի միակ արտադրողն էր։ 2006թ.–ին «Նաիրիտի» բաժնետոմսերի 90 տոկոսը վաճառվեց Rhinoville Property կոնսորցիումին 40 մլն դոլարով, բաժնետոմսերի 10 տոկոսը պատկանում է Հայաստանի կառավարությանը։ 2010թ.–ի ապրիլից գործարանում արտադրությունը դադարեցվել է։