ԵՐԵՎԱՆ, 11 նոյեմբերի – Sputnik. Չորեքշաբթի Ռուսաստանի նախագահ Վլադիմիր Պուտինը հանձնարարել է Հայաստանի հետ ստորագրել համաձայնագիր` Կովկասյան տարածաշրջանում ՀՕՊ միավորված տարածաշրջանային համակարգ ստեղծելու մասին։ Ռուսաստանի պաշտպանության նախարարությունը բանակցություններ կվարի Հայաստանի իշխանությունների հետ և համապատասխան համաձայնագիր կստորագրի։
Ինչպես հաղորդում է Sputnik Ուզբեկստանը, ՌԴ ՊՆ–ին առընթեր Հասարակական խորհրդի անդամ, «Ազգային պաշտպանություն» ամսագրի գլխավոր խմբագիր Իգոր Կորոտչենկոն ներկայացրել է Sputnik–ին, թե ինչու է ՀՕՊ միավորված տարածաշրջանային համակարգի ստեղծումը ձեռնտու ինչպես Ռուսաստանին, այնպես էլ Հայաստանին։
«Հակաօդային պաշտպանության համակարգերի ոլորտում ռուսական տեխնոլոգիաները լավագույնն են աշխարհում։ Մեզ մոտ ստեղծվել է «Ալմազ–Անթեյ» օդատիեզերական պաշտպանության կոնցեռնը, որն արտադրում է ժամանակակից ՀՕՊ մեծ, փոքր և միջին հեռավորության համակարգերի ողջ գամման», – հայտնել է Կորոտչենկոն։
Նրա խոսքերով` Ռուսաստանի շահագրգռվածությունն այն է, որ այդպիսով պետությունը հնարավորություն է ստանում վերահսկել Կովկասի օդային տարածքը։
«Հայաստանի ՀՕՊ համակարգը մենք մտցնում ենք հակաօդային պաշտպանության ընդհանուր տարածաշրջանային համակարգի մեջ, այդպիսով ավելացնում ենք հեռավորությունն ու օդային տարածքի վերահսկման հնարավորությունը, այդ թվում` կովկասյան տարածաշրջանում», – ընդգծել է նա։
Ռուսաստանն ու Հայաստանը համաձայնագիր կստորագրեն ՀՕՊ համակարգերի վերաբերյալ։
Հայաստանը, ռուսական ներուժի վրա հիմնվելով, կարող է ստանալ արտոնյալ գներով նման համակարգեր, ավելացրել է Կորոտչենկոն, եզրահանգելով, որ «Հայաստանի ներառումը Ռուսաստանի հետ հակաօդային պաշտպանության միասնական համակարգի մեջ հնարավորություն կտա արագ և ճկուն արձագանքել օդային անվտանգության հետ կապված ցանկացած սպառնալիքի, որոնք արդիական կլինեն ինչպես Հայաստանի, այնպես էլ Ռուսաստանի համար»։
Հոկտեմբերի վերջին Ռուսաստանի կառավարությունը հավանություն է տվել Կովկասում միավորված ՀՕՊ տարածաշրջանային համակարգերի ստեղծման համաձայնագրին։ Ավելի վաղ Ռուսաստանի ՕՏՈՒ գլխավոր հրամանատարի տեղակալ, գեներալ լեյտենանտ Պավել Կուրաչենկոն հայտնել էր, որ նմանատիպ համակարգեր ռուսական իշխանությունները նախատեսում են ստեղծել նաև Ղրղըզստանի և Տաջիկստանի հետ համատեղ։ Ղազախստանի հետ նմանատիպ համաձայնագիր արդեն իսկ ստորագրվել է 2013 թվականին։
