Կահիրեն համաձայն է, որ ՀԴԲ–ն նույնպես մասնակցի А321–ի վթարի հետաքննությանը

ԵՐԵՎԱՆ, 11 նոյեմբերի– Sputnik. Եգիպտոսը համաձայնել է, որ Հետաքննություն դաշնային բյուրոն (ՀԴԲ) ու ԱՄՆ–ի այլ փորձագետներ մասնակցեն A321 ռուսական ինքնաթիռի վթարի հետաքննության գործին, այդ մասին երեքշաբթի CNN–ին տված հարցազրույցում հայտարարել է Եգիպտոսի ԱԳՆ ղեկավար Սամեհ Շուքրին։

Նրա խոսքով` ամերիկացիները եգիպտական կողմին առաջարկել են մասնակցել հետաքննությանը, Եգիպտոսն էլ անհապաղ ընդունել է առաջարկը։

Ինչպես հաղորդում է հեռուստաընկերությունը, ԱՄՆ–ի տրանսպորտի անվտանգության ազգային խորհուրդն արդեն հարցում է ստացել Եգիպտոսից փորձագետների թիմում ընդգրկվելու մասին։

Հեռուստաալիքի զրուցակցի տվյալով` փորձագետների թիմ հավաքելու համար գերատեսչությունը սպասում է, որ Եգիպտոսից ճշտված տեղեկություն ստանա ինքնաթիռի շարժիչների մասին, որոնք արտադրել է Pratt&Whitney ամերիկյան ընկերությունը։

Ռուսական և խորհրդային ավիացիայի պատմության մեջ խոշորագույն ավիավթարը տեղի է ունեցել հոկտեմբերի 31-ին։ «Կոգալիմավիա» ավիաընկերության` Շարմ էլ Շեյխ – Սանկտ Պետերբուրգ 9268 թռիչքն իրականացնող Airbus-321 օդանավը կործանվել է Սինայի թերակղզու տարածքում: Ինքնաթիռում եղել է 217 ուղևոր և անձնակազմի 7 անդամ: Բոլորը զոհվել են։