ԵՐԵՎԱՆ, 10 նոյեմբերի – Sputnik. «Արփա» կինոփառատոնի լավագույն վավերագրական ֆիլմ անվանակարգում առաջադրված «Հայաստանը շարունակում է երգել մեր սրտերում» ժապավենի հեղինակը Հայաստանում ծնված և ներկայում Բրազիլիայում բնակվող Իզաբելա Բաբլումյանն է, ում ոգեշնչել են Եղեռնը վերապրածների ու նրանց ժառանգների պատմությունները, հայտնում է asbarez.com-ը։
Ֆիլմը նկարահանվել է հինգ տարբեր երկրներում՝ Բրազիլիայում, Արգենտինայում, Միացյալ նահանգներում, Ֆրանսիայում և Հայաստանում: Առանցքում հայ մարդն է, ով ամեն կերպ ջանացել է պահպանել ազգային ինքնությունը հայրենիքից հեռու:
«Հայոց Ցեղասպանութան 100-ամյակին ես ցանկանում էի պատմել հայ ժողովրդի պատմությունը՝ վերապրածների և նրանց ժառանգների տեսանկյունից, ովքեր չնայած հեռավորությանն ու բաժանումին` կարողացել են վերապրել ողբերգությունն ու աշխարհի տարբեր ծայրերում վերստեղծել իրենց կյանքը՝ պահպանելով ինքնությունն ու մշակույթը տարաբնույթ ճանապարհներով»,- նշում է Բաբլումյանը:
Նա պատմում է, որ ֆիլմում ներկայացված են տարբեր սերունդներ, որոնց միջոցով նաև ներկայացվում է տվյալ երկրի Սփյուռքի պատմությունը: Երաժշտության, պարի, խոհանոցի միջոցով դիտողները կարող են յուրատեսակ մշակութային ճամփորդություն կատարել՝ ներկա լինելով տոնախմբությունների, տեղեկանալով ազգայինի պահպանման հարցում առկա մարտահրավերների ու հաջողությունների մասին:
Իզաբելա Բաբլումեանի խոսքով` սզկբում նախատեսված էր նկարահանել 15 րոպեանոց տեսանյութ, սակայն տարբեր համայնքներից ստացված բացառիկ տեսաժապավենների, հաջողված դրամահավաքի և կամավորների աջակցության շնորհիվ ստացվել է վավերագրական ֆիլմ: Նախագծին օգնել են տարբեր ոլորտների արհեստավարժ մասնագետներ։ Ֆիլմում հանդես են եկել չորս հայկական երաժշտական խմբեր, ովքեր տարբեր ոճերում՝ ջազ, ռոք, ժողովրդական, յուրովի մեկնաբանում են հայկական երաժշտությունը:
Միացյալ նահանգներում «Հայաստանը շարունակում է երգել մեր սրտերում» վավերագրական ֆիլմն առաջին անգամ կցուցադրվի «Արփա» միջազգային կինոփառատոնում` Հոլիվուդի Եգիպտական կինոթատրոնում նոյեմբերի 15ին:
Կինոփառատոնը հիմնադրվել է 1997 թ-ին, հիմնական առաքելությունն է ստեղծել համապատասխան միջավայր միջազգային կինոյի զարգացման համար: Այն խնդիր է դրել հանդիսատեսին ներկայացնել մարդկային յուրօրինակ պատմություններ և ճակատագրեր, որոնց ֆիլմի հեղինակները հանդիպում են հարափոփոխ աշխարհում: ARPA-ն ներկայացնում է այն ռեժիսորների աշխատանքները, որոնք կարողանում են ընկալել ազգային տարբեր առանձնահատկություններ և աջակցում է այն մարդկանց, որոնք ուսումնասիրում են սոցիալական և մշակութային թեմաներ:
