ԵՐԵՎԱՆ, 6 նոյեմբերի – Sputnik. Պետերբուրգում նոր արձան է հայտնվել։ Վասիլևսկի կղզու Կամսկի այգում հայկական դուդուկի ձայների ներքո Երևանի և Պետերբուրգի կառավարությունները բացեցին հայ մեծ կոմպոզիտոր Կոմիտասի հուշարձանը, հաղորդում է spbdnevnik.ru-ն։
Աշնանային մառախլապատ մի օր Երևանից ժամանած պատվավոր հյուրերը, Պետերբուրգի կառավարության ներկայացուցիչները, հայ համայնքի անդամները և հոգևորականները հավաքվել էին Սմոլենկա գետի ափին։ Սանկտ Պետերբուրգի նահանգապետ Գեորգի Պոլտավչենկոն ընդգծել է, որ հուշարձանի տեղադրման վայրը պատահական չի ընտրվել` 18-րդ դարի առաջին կեսին Վասիլևսկի կղզում հայկական համայնք կար, այստեղ են կառուցվել նաև հայկական առաջին տաճարները։
«Այս տեղն, առանց չափազանցության, Պետերբուրգի հայերի հոգևոր կյանքի կենտրոնն է, – ասաց Գեորգի Պոլտավչենկոն, – սուրբ վայր է նաև քաղաքի բնակիչների համար` ոչ հեռու Նևայի ափին նիրհում է քաղաքի հովանավոր երջանկահիշատակ Քսենյուշկա Պետերբուրգսկայան»։
Գեորգի Պոլտավչենկոյի խոսքերով` Հայաստանն ու Սանկտ Պետերբուրգն այսօր գտնվում են ոչ միայն զուտ բարեկամական հարաբերությունների մեջ, այլև սերտ հոգևոր և մշակութային կապեր ունեն։
«Կոմիտասն այն արվեստագետն է, ով ամբողջ աշխարհում ճանաչելի դարձրեց հայ երաժշտությունը, ում տաղանդին և հիասքանչ կատարումներին ծափահարում էին Եվրոպայի լավագույն դահլիճներում, – ընդգծել է Գեորգի Պոլտավչենկոն, – նա դարձավ միասնական համաշխարհային մշակույթի խորհրդանիշը»։
Սանկտ Պետերբուրգի օրենսդրական ժողովի նախագահ Վյաչեսլավ Մակարովի խոսքերով` հայկական արվեստը համաշխարհային մշակույթի յուրահատուկ դրսևորումներից է։
«Մեր բարեկամությունը ոչ թե դարերի, այլ արդեն հազարամյակների պատմություն ունի, – ասել է Վյաչեսլավ Մակարովը, – մենք դժվար ժամանակներում ենք ապրում, սակայն միասին ենք թե՛ ուրախության և թե՛ տխրության մեջ»։
Ռուսաստանում Հայաստանի դեսպոն Օլեգ Եսայանը շնորհակալություն է հայտնել Սանկտ Պետերբուրգի կառավարությանը` Հայոց ցեղասպանության 100-րդ տարելիցին նվիրված միջոցառումների շրջանակում արձանի տեղադրման հարցում ցուցաբերած օգնության համար։
«Մեծ Կոմիտասի այս արձանը բացվում է մեծ Պյոտրի մեծ քաղաքում, – ընդգծել է նա, – ես համոզված եմ, որ այս հուշարձանը Հյուսիսային մայրաքաղաքի արժանի զարդը կլինի»։
Բացված արձանի մոտ հայկական դուդուկի ձայների ներքո աղոթք կարդացին Հայ առաքելական եկեղեցու աբեղա Պողոս Վարդանյանը և Սանկտ Պետերբուրգի թեմի բարեպաշտ ավագ քահանա Վիկտոր Մոսկովսկին։
Մեծ կոմպոզիտոր Կոմիտասի (իսկական անունը` Սողոմոն Սողոմանյան – 1869-1935) արվեստը հայտնի է ողջ աշխարհում։ Պետերբուրգում տեղադրված արձանը Կոմիտասին պատկերում է հոգևորականի հանդերձանքով` 1893 թվականին նա դարձել է հոգևորական և զուգահեռաբար զբաղվել է երաժշտությամբ։ Կոմպոզիտորի ուսուցիչը եղել է Պետերբուրգի կոնսերվատորիայի շրջանավարտ Մակար Եկմալյանը։
