Ավտովթարից տուժած անձանց տեղափոխեցին բժշկական կենտրոն

ԵՐԵՎԱՆ, 6 նոյեմբերի – Sputnik. Հատուկ չվերթով Երևան ժամանած օդանավը Հայաստան տեղափոխեց Ռուսաստանի Դաշնության Տուլայի տարածաշրջանի Ուզլովսկի քաղաքի մոտ Մոսկվա-Երևան երթուղու ուղևորատար ավտոբուսի վթարից տուժած 32 քաղաքացիներին և 8 զոհերի աճյունները

Ութ տուժածներին օդանավից անմիջապես տեղափոխեցին ՀՀ ԱՆ «Սուրբ Գրիգոր Լուսավորիչ» բժշկական կենտրոն:

«Զվարթնոց» օդանավակայանում լրագրողների հետ զրուցեցին ՀՀ տրանսպորտի և կապի նախարար Գագիկ Բեգլարյանն ու ՀՀ առողջապահության նախարար Արմեն Մուրադյանը:

Ինչպես նշեց Գագիկ Բեգլարյանը, ՀՀ տրանսպորտի և կապի նախարարությունը նոր օրինագիծ է պատրաստում, որը կխստացնի ոչ կանոնավոր ուղևորափոխադրումների վերահսկողությունը: Ըստ նրա, Ռուսաստանում Տուլայի բժշկական հաստատություններում բուժումը կշարունակեն տուժածներից 12-ը։ Նրանք հիվանդանոցներում կմնան այնքան ժամանակ, մինչև առողջական վիճակով պայմանավորված հնարավոր կլինի նրանց տեղափոխվել Հայաստան: Մյուս տուժածները վերադարձել են Հայաստան:

«Մեծ մասին տեղափոխել են հիվանդանոց, մյուսները ցանկացան տուն գնալ: Օդանավում նրանց կողքին էին հոգեբաններն ու ռեանիմատոլոգները: Թռիչքի ընթացքում ոչ մի միջադեպ չի գրանցվել: Տեղափոխված անձանցից 3-ի մոտ առկա է ողնաշարի վնասվածք, և տեղափոխումը կազմակերպվել է ռեանիմոբիլներով` մասնագետների հսկողությամբ»,- ասաց առողջապահության նախարար Արմեն Մուրադյանը:

Նա նշեց, որ հայկական պատվիրակությունը Ռուսաստանում այցելել է բոլոր հիվանդներին: «Երկուսը ծայրահեղ ծանր վիճակում են, որոնցից մեկին այսօր վիրահատեցին»,- ասաց նախարարը:

Ավտովթարը տեղի է ունեցել երեքշաբթի Տուլայի մարզի տարածքում։ Մոսկվա–Երևան ավտոբուսում ավելի քան 60 մարդ է եղել, բոլորը` Հայաստանի քաղաքացիներ։ Վթարի հետևանքով մահացել է ութ մարդ, տուժել՝ 48–ը: Ավտոբուսի վարորդը կալանավորված է, նա առողջական խնդիրներ չունի:

Վթարի հետևանքով զոհված քաղաքացիների աճյունների տեղափոխումը կազմակերպել է ՀՀ առողջապահության նախարարության դատաբժշկական կենտրոնը, որտեղից նոյեմբերի 6-ի առավոտյան ժամը 10:00-ից դիերը կհանձնվեն հարազատներին։