ՆԳՆ. Ավտոբուսը շրջվել է ղեկի մոտ քնած վարորդի պատճառով

ԵՐԵՎԱՆ, 5 նոյեմբերի– Sputnik. Տուլայի մարզում Մոսկվա–Երևան ավտոբուսի վթարըտեղի է ունեցել ղեկին քնած վարորդի պատճառով, հինգշաբթի ասել է ՆԳՆ ղեկավարի տեղակալ, քննչական բաժնի պետ Ալեքսանդր Սավենկովը։

ՃՏՊ–ից հետո հոսպիտալացված անձանցից 12–ը դեռ հիվանդանոցում են։

«Ուղևորափոխադրումների և բեռնափոխադրումների ոլորտում ՃՏՊ–ների քանակի ավելացման պատճառներից մեկն այն է, որ վարորդները խախտում են աշխատանքի և հանգստի ռեժիմը։ Այդ խնդիրը համատարած է։ Նույնիսկ եթե քննենք վերջին օրերի իրադարձությունները, պատճառը նույնն է. վարորդն ուղղակի քնել է ղեկի դիմաց»,– ասել է նա` ելույթ ունենալով Պետդումայում։

Երեքշաբթի Տուլայի մարզի տարածքում խոշոր վթար է գրանցվել. շրջվել է Մոսկվայից Երևան եկող ավտոբուսը։ Ավտոբուսում եղել է ավելի քան 60 մարդ, բոլորը` Հայաստանի քաղաքացիներ։ Վթարի հետևանքով մահացել է ութ մարդ, տուժել 48–ը, որոնցից 10–ը գտնվում են վերակենդանացման բաժանմունքում։

Մայրաքաղաքի պետավտոտեսչությունը բացահայտել և արգելել է Ռուսաստանի տարածքում շահագործել ևս երկու նման ուղևորատար ավտոբուսներ, որոնք պետք է Մոսկվայից Երևան մեկնեին։

Սավենկովի խոսքով` նույն պատճառը եղել է ավտովթարի դեպքում, որը տեղի է ունեցել հունիսի 24–ին Օմսկի մարզում, երբ ավտոբուսը բախվել է հանդիպակաց «Կամազին», ինչի հետևանքով մահացել է 16 մարդ, տուժել` 11–ը։ «Հետաքննության ընթացքում պարզվել է, որ վարորդը գերհոգնածության պատճառով սրտի կաթված է ստացել։ Դրանք մեր ենթադրությունները չեն, դա փորձագետների եզրակացությունն է»,– ասել է փոխնախարարը։