ԵՐԵՎԱՆ, 5 նոյեմբերի – Sputnik. Մոսկվա-Երևան ավտոբուսի վթարից տուժածները, մահացածների հարազատները եւ Երևանից մեկնած` կառավարության ներկայացուցիչները մերձմոսկովյան Ռամենսկի օդանավակայանում սպասում են թռիչքին, հայտնում է news.am-ը։
Օդանավակայանում գտնվողները «Ֆեյսբուքում» լուսանկարներ են տեղադրել Ռուսաստանի ԱԻՆ-ի ինքնաթիռից, որով հատուկ չվերթով քիչ անց կուղևորվեն Հայաստան։
Հիշեցնենք, որ օդանավում սարսափելի վթարից տուժած 32 ուղեւորներն են, հայկական պատվիրակության անդամները, որի կազմում են ՀՀ տրանսպորտի եւ կապի նախարար Գագիկ Բեգլարյանը և Առողջապահության նախարար Արմեն Մուրադյանը, նաև զոհվածների 17 հարազատներ։ Ինքնաթիռը կբերի նաև վթարից 8 զոհվածների մարմինները:
Նոյեմբերի 3-ի գիշերը Մոսկվա-Երևան ավտոբուսի վթարի հետեւանքով մի քանի տասնյակ մարդ է տուժել: Յոթ մարդ զոհվել է։ Եվս մեկը մահացել է հիվանդանոցում։
Ավտովթարի հետ կապված քրեական գործ է հարուցվել «ճանապարհային երթեւեկության և տրանսպորտային միջոցների շահագործման կանոնների խախտում» հոդվածով։ Համանման քրեական գործ է հարուցված նաև Հայաստանում։ Նախնական տեղեկությունների համաձայն, վարորդը քնել էր ղեկին։ Վարորդ Գառնիկ Հարությունյանը կալանավորված է։
Sputnik Արմենիան կապ հաստատեց Հայաստանի առողջապահության փոխնախարար Գագիկ Միրիջանյանի հետ, և վերջինը նշեց, որ տուժածները, մահացածների հարազատներն ու կառավարության ներկայացուցիչներն արդեն ինքնաթիռի սրահում են և սպասում են թռիչքին։ Փոխնախարարն ավելի վաղ տեղեկացրել էր, որ Հայաստանի առողջապահության նախարար Արմեն Մուրադյանի կարգադրությամբ ինքը Ռուսաստանում կմնա մինչև շաբաթ օրը՝ տուժածներին հետագա պրոֆեսիոնալ բժշկական օգնություն ցուցաբերելու և իրավիճակին հետևելու համար:
