Ադբաշյան. Ռուսական օդանավի կործանման բացահայտումը կախված է մեծ քաղաքականությունից

ԵՐԵՎԱՆ, 5 նոյեմբերի – Sputnik. Ազգային ավիացիոն միավորման նախագահ, ԽՍՀՄ վաստակավոր օդաչու Դմիտրի Ադբաշյանը կարծում է, որ հոկտեմբերի 31-ին վթարի ենթարկված ռուսական օդանավի կործանումը բացահայտելու հարցում քաղաքական շահեր են բախվում։

Հոկտեմբերի 31-ին «Կոգալիմավիա» ավիաընկերության` Շարմ էլ Շեյխ – Սանկտ Պետերբուրգ 9268 թռիչքն իրականացնող Airbus-321 օդանավը կործանվել էր Սինայի թերակղզու տարածքում: Ինքնաթիռում եղել էր 217 ուղևոր և անձնակազմի 7 անդամ: Բոլորը զոհվել էին։

Ադբաշյանը նշում է, որ եգիպտական կողմը բացառում է այն վարկածը, թե օդանավի կործանումը կարող է ահաբեկչական գործողությունների հետևանք լինել, և դա, իհարկե, իր մեկնաբանությունն ունի. Եգիպտոսի բյուջեն մեծապես գոյանում է զարգացած տուրիզմի շնորհիվ, հետևաբար եգիպտական իշխանությունը վտանգի չի ենթարկի տարիների ընթացքում վաստակած զբոսաշրջային հեղինակությունը:

«Բրիտանական մամուլը, հղում անելով երկրի վարչապետի գրասենյակի պաշտոնական հայտարարությանը, կարծում է, որ գնալով մեծանում է պայթուցիկի գործարկման հավանականությունը: Ասեմ, որ քաղաքական շահերի բախում եմ տեսնում, ու այս գործի վերջնական բացահայտումը կախված է հենց մեծ քաղաքականությունից»,– նշում է Ադաբաշյանը։

Վաստակավոր օդաչուն հիշեցնում է, որ 2001 թվականին նշյալ օդանավի պոչը կպել է թռիչքուղուն ու վնասվել: «Ինքնաթիռի պոչի վրա սովորաբար տեղադրված է լինում  «хвостовая пята» կոչվող անվտանգության սարքը: Սակայն հարվածն այնքան ուժեղ է եղել, որ պոչի մեջ առաջացել են մանր ճաքեր: Փորձագետների կարծիքով դրանք ժամանակին չեն հայտնաբերվել ու մեծացել են: Դա ևս վթարի հավանական պատճառներից է»,– ասում է Ադաբաշյանը:

Հայտնի է, որ «Կոգալիմավիա» ընկերության տեխնիկական սպասարկման կենտրոնը սպասարկում է թուրքական մի ընկերություն: Ավիափոխադրող ընկերությունը կարող է պատասխանատվության կանչել հենց տեխանձնակազմին:

Դմիտրի Ադբաշյանը տեղեկացնում է նաև, որ օդանավերում լինում է 3 «սև արկղ», որոնցից մեկը ձայնագրում է օդաչուների խոսակցությունը: «Դա տվյալ օդանավում վնասվել է, բայց մասնագետնրն ասում են, որ նորոգման ենթակա է: Այն ձայնագրությունը, որ տարածվել է համացանցում, իրականությանը չի համապատասխանում: «Սև արկղի» ձայնագրությունը հրապարակման դեռ չի ներկայացվել: Այս պահին ես էլ բոլորի պես սպասում եմ «սև արկղերի» վերծանմանը»,– նշում է Ազգային ավիացիոն միավորման նախագահը: