ԵՐԵՎԱՆ, 5 նոյեմբերի– Sputnik. Տուլայի մոտ շրջված ավտոբուսի ուղևորներից 12–ը կմնան Ռուսաստանում բուժվելու համար, մյուսները կվերադառնան տուն, հինգշաբթի լրագրողներին ասաց Հայաստանի տրանսպորտի և կապի փոխնախարար Արթուր Առաքելյանը։
Երեքշաբթի Տուլայի մարզի տարածքում խոշոր վթար է տեղի ունեցել. շրջվել է Մոսկվայից Երևան եկող ավտոբուսը։ Ավտոբուսում եղել է ավելի քան 60 մարդ, բոլորը` Հայաստանի քաղաքացիներ։ Վթարի հետևանքով մահացել է ութ մարդ, տուժել 48–ը, որոնցից 10–ը գտնվում են վերակենդանացման բաժանմունքում
«Հայաստանի և Ռուսաստանի տրանսպորտի նախարարներ Գագիկ Բեգլարյանը և Մաքսիմ Սոկոլովը կազմակերպել են հատուկ չվերթ, որն այսօր Երևանի ժամանակով 17։00–ին Մոսկվայից կտեղափոխի այն տուժածներին, որոնց բժիշկները թույլատրել են տեղափոխել, ինչպես նաև` մահացածների մարմինները։ Տուլայի հիվանդանոցներում կմնա 12 մարդ, որտեղ նրանք կլինեն հայկական և ռուսական կողմերի համատեղ ուշադրության տակ»,– ասել է Առաքելյանը։
Նրա խոսքով` արդեն վթարից մեկ ժամ անց Հայաստանի տրանսպորտի և կապի նախարար Գագիկ Բեգլարյանին ծանուցել են այդ մասին, և նա կապ է հաստատել ռուս գործընկերոջ` Մաքսիմ Սոկոլովի հետ։ Վերջինը հավաստիացրել է, որ պատահարի առնչությամբ անցկացվում են բոլոր անհրաժեշտ գործողությունները։
«Տուլայի նահանգապետն ասել է, որ բոլոր հարցերն իրենք կլուծեն։ Նախագահի հանձնարարականով ստեղծվել է հատուկ հանձնաժողով` Բեգլարյանի գլխավորությամբ։ Հանձնաժողովի նիստում ցուցումներ են տրվել բոլոր լիազոր և պատասխանատու մարմիններին և որոշում է ընդունվել նախարարի գլխավորությամբ պատվիրակություն ուղարկել Տուլա»,– ասել է Առաքելյանը։
Նախարարի խոսքով` նոյեմբերի 3–ի երեկոյան պատվիրակությունը մեկնել է Մոսկվա, այնտեղից` Տուլա, որտեղ նոյեմբերի 4–ին անցկացվել համատեղ նիստ ռուս գործընկերների հետ, իսկ Հայաստանի առողջապահության նախարարը, որը գտնվել է պատվիրակության կազմում, համոզվել է, որ անցկացվում են համապատասխան միջոցառումներ, տուժածներին ցուցաբերվում է անհրաժեշտ օգնություն։
«Բոլոր տուժածները նշում են, որ վթարից հետո նրանց շատ արագ և կազմակերպված տեղափոխել են հիվանդանոց»,– ասել է Առաքելյանը։
Նրա խոսքով` այսօր Հայաստանի վարչապետ Հովիկ Աբրահամյանը հայտարարել է, որ մահացածների հուղարկավորության բոլոր ծախսերը ստանձնում է կառավարությունը։
«Ինչ վերաբերում է մահացածների մարմիններին, ապա նրանք կտեղափոխվեն դատաբժշկական կենտրոն, համապատասխան ընթացակարգերից հետո կհանձնվեն հարազատներին»,– ասել է Առաքելյանը։
Առաքելյան. ավտովթարից տուժած անձանցից 12-ը կմնան Տուլայում
16:19 05.11.2015 (Թարմացված է: 16:40 05.11.2015)
© МЧС России по Тульской области
Բաժանորդագրվել
Վթարից մեկ ժամ անց ՀՀ տրանսպորտի և կապի նախարար Գագիկ Բեգլարյանին ծանուցել են պատահարի մասին, և նա կապ է հաստատել ռուս գործընկերոջ` Մաքսիմ Սոկոլովի հետ
