ԵՐԵՎԱՆ, 5 նոյեմբերի — Sputnik. ՌԴ ԱԻՆ Իլ-76-ը Երևան կտեղափոխի Տուլայի մոտ ավտոբուսի ՃՏՊ-ից տուժածներին, ինչպես նաև զոհվածների մարմինները, լրագրողներին հայտնել է նախարարության մամուլի ծառայությունը:
Sputnik Արմենիայի տվյալներով՝ զոհվածների մարմիններով և 29 տուժածներով ինքնաթիռը Երևան կժամանի մոտավորապես տեղական ժամանակով ժամը 20:00-ին:
2015 թվականի նոյեմբերի 3-ին` ժամը 03-ի սահմաններում Ռուսաստանի Դաշնության Տուլայի տարածաշրջանի Դոն ավտոմայրուղում, Մոսկվա-Երևան երթուղին իրականացնող ավտոբուսը վթարի է ենթարկվել: Այն պատկանում էր ՀՀ-ում հաշվառված «Կինգ Դելյուքս» ՍՊԸ-ին: Ավտոբուսում գտնվում էր ավելի քան 60 մարդ, բոլորը` Հայաստանի քաղաքացիներ։ Վթարի հետևանքով մահացել է 8 մարդ, տուժել 46-ը, որոնցից 11-ը գտնվում են վերակենդանացման բաժանմունքում: Ավտոբուսի վարորդի նկատմամբ հարուցվել է քրեական գործ «ճանապարհային երթևեկության կանոնների խախտում, որն անզգուշությամբ հանգեցրել է երկու կամ ավելի անձանց մահվան» հոդվածով, նա կալանավորված է:
Տուլայի մերձակայքում վթարի ենթարկված ավտոբուսի վարորդը ձերբակալվել է 2 ամսով:
«ԱԻՆ-ը նախապատրաստում է Իլ-76 օդանավը Հայաստան մեկնելու համար, որը Երևան կտեղափոխի ավտոբուսի վթարից տուժած 29 ուղևորներին, ինչպես նաև զոհվածների մարմինները: ԱԻՆ օդանավում հարմարեցված կլինի չորստեղանոց բժշկական մոդուլ` ծանր վիճակում գտնվող մարդկանց տեղափոխման համար», — ասել է ԱԻՆ ներկայացուցիչը:
Նա նշել է, որ մերձմոսկովյան Ռամենսկոյե օդանավակայան, որտեղից Հայաստան է ուղևորվելու Իլ-76-ը, Տուլայից երեք ծանր վիճակում գտնվողներին կհասցնեն ԱԻՆ Մի-8 ուղղաթիռով` սարքավորված բժշկական մոդուլներով: Զոհվածների մարմինները Ռամենսկոյե կտեղափոխվեն ավտոտրանսպորտով: Եվս 26 ուղևորի, որոնք թեթև վնասվածքներ են ստացել ՃՏՊ-ի հետևանքով, կտեղափոխեն ավտոբուսով:
ԱԻՆ-ից ճշտեցին, որ ինքնաթիռի թռիչքը նախատեսված է օրվա երկրորդ կեսին: Ուղևորներին և տուժածներին ուղեկցելու են նրանց բարեկամները, Հայաստանի ՏԿԱԻՆ և հյուպատոսության ներկայացուցիչները: Ընդհանուր առմամբ երևան կտեղափոխվի 60 մարդ:
