ԵՐԵՎԱՆ, 4 նոյեմբերի– Sputnik. Հարավային Սուդանի իշխանությունը պնդում է, որ Ան-12 զոհված ուղևորների թվում կա 5 հայ և 1 ռուս
Ան-12 ինքնաթիռը ընկել է Հարավային Սուդանի օդանավակայանից դուրս գալուց հետո Ջուբա քաղաքում։ Օդանավում 12 ուղևոր կար և անձնակազմի 6 անդամ։
«Հարավային Սուդանում վթարի ենթարկված Ան-12 ինքնաթիռում կար 12 ուղևոր և անձնակազմի 6 անդամ, որոնց թվում 5 հայ և 1 ռուս, հայտնել է Հարավային Սուդանի նախագահի ներկայացուցիչ Աթենի Վեք Աթենին` ավելացնելով, որ բոլոր 12 ուղևորներն էլ սուդանցիներ են եղել»։
«Հարավային Սուդանի ավիավթարից ողջ մնացած երեք ուղևորներն էլ Հարավային Սուդանի քաղաքացիներ են», – ավելացրել է Աթենին։
Նախագահի ներկայացուցիչը նաև հաստատել է, որ ինքնաթիռը պատկանել է տեղական` Allied Services Limited ավիաընկերությանը։
South Sudan Tribune պարբերականն ավելի վաղ հայտնել էր, որ Ան-12 բեռնատար ինքնաթիռն ավիավթարի էր ենթարկվել Հարավային Սուդանի Ջուբա քաղաքի օդանավակայանից դուրս գալուց անմիջապես հետո։ Տեղական ԶԼՄ–ների տեղեկատվության համաձայն` ինքնաթիռն ուղևորվում էր Պալոչ (Paloch) քաղաք։
Ռեյթերս գործակալությունը, հղում անելով ականատեսներին, հայտնել էր, որ ինքնաթիռի պոչն ու մյուս մասերը ցաքուցրիվ փռված են Սպիտակ Նեղոս գետի ափերին։ Նախագահի աշխատակազմի ներկայացուցիչը հայտնել է, որ բացի ուղևորներից ու Ան-12 օդանավի անձնակազմից, վթարի պատճառով զոհվել են նաև ցամաքում գտնվող մարդիկ։ Ականատեսների տվյալներով` աղետի վայրում կարող էր գտնվել 40 մարմին, մասնավորապես, ոստիկանության աղբյուրը հայտնել է 41 զոհերի մասին։
