ԵՐԵՎԱՆ, 4 նոյեմբերի– Sputnik. Հարավային Սուդանի մայրաքաղաք Ջուբայում չորեքշաբթի վթարի ենթարկված ռուսական Ան-12 բեռնատար ինքնաթիռը Հայաստանում գրանցված չի եղել, Sputnik Արմենիա պորտալին հայտնեց Քաղավիացիայի գլխավոր վարչության մամուլի քարտուղար Ռուբեն Գրձելյանը
Ավելի վաղ ԶԼՄ–ներում տեղեկություն էր հայտնվել, որ Հարավային Սուդանում վթարի ենթարկված ինքնաթիռը կարող էր պատկանել հայկական ավիաընկերությանը։
«Այդպիսի օդանավ չկա Հայաստանում գրանցված ընկերություններում», – ասաց Գրձելյանը` ավելացնելով, որ դրանց գրանցումը հանրապետությունում արգելված է օրենսդրորեն։
Հայկական ավիացիոն շրջանների աղբյուրն իր հերթին հայտնեց, որ կործանված ինքնաթիռի հիմնական ուղևորները հայեր են, սակայն արդյո՞ք նրանք ՀՀ քաղաքացիներ են, պարզ չէ։
«Հայաստանում այդ ինքնաթիռների շահագործումն արգելվել է դեռ անցյալ տարի` դրանց հուսալի չլինելու պատճառով», – ավելացրեց աղբյուրը։
Հայաստանի ԱԳՆ–ից հայտնեցին, որ վթարի վերաբերյալ որևէ տեղեկություն չունեն։
